Дьон маассабайдык сүһүрбүттэринэн холуобунай дьыала тэрилиннэ

Нерюнгри куораттааҕы силиэстийэлиир отделынан дьон маассабайдык сүһүрүүтүн чахчытынан холуобунай дьыала тэрилиннэ.

РФ Силиэстийэлиир кэмитиэтин Нерюнгри куораттааҕы силиэстийэлиир отделынан Нерюнгри оройуонугар дьон маассабайдык сүһүрүүтүн чахчытынан РФ Холуобунай Кодексатын 238-с ыстатыйатын 1-гы чааһынан (нэһилиэнньэ олоҕор уонна доруобуйатыгар куттала суох буолуу ирдэбиллэригэр эппиэттээбэт өҥөнү оҥоруу) буруйу оҥоруу бэлиэлэринэн холуобунай дьыала тэрилиннэ. Бу туһунан Саха сиринээҕи Силиэстийэлиир кэмитиэтин сулууспатын пресс-сулууспата иһитиннэрэр.

Барыллааһын дааннайдарынан, от ыйын 3-5 күннэригэр Нерюнгри куоракка Олоҥхо ыһыаҕа ыытыллар сиригэр уопсастыбаннай аһылык тэрийээччилэрэ санитарнай-эпидемиологическай ирдэбиллэри кэһэн, хаачыстыбата суох аһы атыылаабыттар.

Ол түмүгэр дьон маассабайдык сүһүрэн, 9 эмсэҕэлээбит киһи балыыһаҕа киирбит. Холуобунай дьыаланан буолбут быһылаан төрүөттэрин быһаарарга силиэстийэлиир тэрээһиннэр ыытыллаллар. Холуобунай дьыаланы силиэстийэлээһин силиэстийэлиир управление салайааччыларынан хонтуруолланар.