Дьон олоҕун тупсарыыга туһуланар этии

Петербурдааҕы экэнэмиичэскэй пуорум сүрүн тэрээһининэн пленарнай мунньахха РФ Бэрэсидьиэнэ Владимир Путин тыл этиитэ буолла.

Бу туһунан Ил Дархан Айсен Николаев бэйэтин телеграм-ханаалыгар санаатын үллэһиннэ. Кини дойду экэнимэмикэтэ сайдарын, ол холобура Саха сиригэр көстөрүн бэлиэтээтэ. Ол курдук, өрөспүүбүлүкэҕэ бырамыысыланнас оҥорон таһаарыыта, социальнай өйөбүлгэ өрөспүүбүлүкэ бүддьүөтүттэн 150 млрд ананыыта, сыл аайы саҥа  уһуйааннар, оскуолалар, балыыһалар, атын да социальнай эбийиэктэр тутуллуулара бэрэсидьиэн этиитин кытта ыкса сибээстээх.

Маны тэҥэ, Ил Дархан биисинэс салаата Саха сирин Национальнай рейтиҥҥэ 5-с миэстэҕэ таһаарбытын,  ИТ-эйгэ олохтоохтук сайдан «Оскуола 21» Сбер бырайыага дойдуга олоххо киириитин бэһис куоратынан Дьокуускай буолбутун иһитиннэрдэ. «Саамай кылаабынайа — бэрэсидьиэн холобурдаабыт хас биирдии бырайыага, көҕүлээһинэ дьон олоҕун тупсарыыга туһуланар» диэн түмүктүүр бэйэтин санаатын Ил Дархан.