Дьон санаатын көтөҕөр, үөрдэр-көтүтэр кинигэлэр таҕыстылар

Суруйааччы Константин Эверстов кылгас кэм иһигэр икки саҥа кинигэтэ таҕыста.

Ол курдук, ааспыт сыл ахсынньытыгар «Көрдөөхтөн күлүөххэ, дьээбэттэн тиллиэххэ» диэн дэриэбинэ уонна куорат олоҕуттан элбэх дьээбэ-хообо, көрдөөх кэпсээннэрин кинигэтэ тахсан, Саҥа Дьылга ааҕааччыларга күндү бэлэх буолбута.

-Бу күннэргэ «Оҕолорбут саҥалара» диэн аллараанан тооторуйа сылдьар кырачаан дьоннорбут, оҕолорбут көрүдьүөс, дьээбэ саҥаларын мунньан кинигэ оҥорон таһаардым, — диэн кэпсиир суруйааччы. — Манна хас да көлүөнэ оҕолор саҥаларын түмтүм, онон ордук кэрэхсэбиллээх буолуоҕа. Онон бэйэҕит оҕолоргут саҥарбыт саҥаларын да булан ааҕыаххытын сөп.

Константин Эверстов бу билиҥҥи ыарахан, тубар олохпут ымпыгын-чымпыгын көрдөрө сатаабакка,  дьон санаатын көтөҕөр, үөрдэр-көтүтэр аналлаах көрдөөх айымньылары өссө да айар, суруйар былааннаах.