Дьон санаатын таппыт эдэр ыал былааннара киэҥ

Кэлиҥҥи кэмҥэ оҕолорун көрөн олорор эдэр ийэлэр бэйэлэрин сатабылларын, кыахтарын олоххо киллэрэн, бэйэ дьыалатын тэринэллэрэ элбээтэ. Онуоха кинилэри олохторун аргыстара – кэргэттэрэ өйүүр буолан, дьиэ кэргэн дьыалата биир хайысханы тутуһан үлэлиирэ быдан тахсыылаах.

Уус Алдан Хомустааҕын олохтооҕо Анастасия Семенова айар куттаах киһи буолан, оҕо эрдэҕиттэн бары дьарыкка холоно сылдьыбыт эбит. Иккис оҕотун оҕолоноот, «баччааҥҥа диэри туох да дьарыгым суох, ама, маннык оҕо көрүүнэн олоруом дуо, тугу эрэ гыннахха сатанар…” дии санаат, дууһатыгар иитиэхтии сылдьар дьарыгын сайыннарарга санаммыт.

Бүгүн “Сатабыл” рубрикаҕа ыалдьыттыыр бэйэ дьарыктаах буолуутун хантараагынан ситиһиилээхтик үлэлии сылдьар эдэр ийэ Анастасия Семенова.

Сонун дьыалаҕа ылсыы

— Анастасия, эн аныгы үйэ киһитэ буолан, билиҥҥи кэмҥэ олус сөптөөх хайысханы тобулбуккун. “Дьыалабыай бэлэх” диэн мастарыскыайы тэринэн, кэргэҥҥиниин күн солото суох сылдьар эбиккит. Бэртээхэй саҕалааһын туохтан саҕыллыбытай?

— Сунтаар бэйэтиттэн төрүттээхпин. Ыал буолаат, кэргэним дойдутугар Уус Алдан Хомустааҕар олохсуйбуппут. Бииргэ төрөөбүттэр төрдүөбүт, мин үһүс оҕобун. Аҕам миигин бэйэтиттэн олох араарбат этэ. Булка кытта илдьэрэ. Инженер үөрэхтээх буолан, киниттэн тиэхиньикэҕэ сыстаҕас буола улааппытым. Оскуолабын бүтэрэн баран, потребительскай кэпэрээссийэ кэллиэһигэр үөрэммитим. Онтон гаас уонна ньиэп үөрэҕин баһылаабытым. Билигин санаатахха, бүгүҥҥү үлэм хайысхатыттан ыраах да сылдьыбыппын. Онтон сирдээҕи олоҕум аналын көрсөбүн. Быһыыта, кыыс аҕатын курдук киһиэхэ эргэ тахсар диэн мээнэ эппэтэхтэр эбит. Иваным, таптал аата Айбаан, аҕабар майгынныыр өрүтэ элбэх. Эмиэ суоппар буолан, бары тиэхиньикэҕэ сыстаҕас. Ол иһин иккиэн дьоҕус биисинэһи тэриниигэ холкутук киирбиппит. Аныгылыы эттэххэ, чаһы “шестеренкалара” курдукпут. Уйбаан тэриллэрбитин барытын бэйэтэ көрөр-истэр, мин араас бырагыраамалары хасыһан үөрэтиигэ өйүм тобуллаҕас. Онон бэйэ-бэйэбитин ситэрэн биэрэбит. Иккиэн бииргэ үлэлиир кыахтаах эбиппит диэн, гарааспытын мастарыскыай оҥостон, араас сувенирдары оҥорон барбыппыт. Ону бэлиэтии көрөн, тэрилтэлэр бииртэн-биир мэтээллэри, куубактары, өйдөбүнньүк сурунар сувенирдары сакаастыыр буолбуттара. Бастакы улахан сакаас 2022 сыллаахха оскуоланы бүтэрэр оҕолорго бэлэхтэн саҕаламмыта. Онтон этэрбэс араадьыйата бииртэн биир сакааһы аҕалан барбыта. Дьыалабыай сувенир кэмэ кэлбитин онно өйдөөбүппүт.

 Социальнай хантараак абыраллаах өйөбүлэ

— Үлэҕит тэрилин “бу наада эбит” диэн хайдах тэринэн барбыккытый? “Дьыалабыай мастарыскыай” диэн үлэҕит хайысхатыгар бэркэ таба тайаммыккыт.

— 2022 сыллаахха бииргэ төрөөбүт эдьиийим кэргэниниин судаарыстыба өйөбүлүн туһанан, социальнай хантараак баттаһан, лазернай ыстаныак ылан үлэлээн барбыттара. Дьэ, ону билэн баран, “мин эмиэ итинник оҥоруохпун баҕарабын…” диэн дууһабар иитиэхтии сылдьыбыт санаам уоттуу умайбыта. Эдьиийим сиһилии сүбэлээн, биһиги эмиэ социальнай хантараак баттаһан, бэйэ дьыалатын тэринэргэ санаммыппыт. Кэргэним биисинэс былааммытын бэйэтэ тустаах хамыыһыйа иннигэр көмүскээн, биһирэбил ылан, үөрүү кынатыгар уйдаран, саҥа үлэбит күөстүү оргуйан барбыта. Онон 2021 сыл күһүнүгэр лазернай ыстаныак ылынан, үлэбит бары өттүнэн чэпчээбитэ, саҥаттан саҥа идиэйэ күөрэйэн испитэ. Саамай ыарахана — тустаах бырагырааманы баһылааһын этэ. Утуйар уубун умнан, түүннэри-күнүстэри сыл аҥаарын быһа Corel Draw бырагырааманы үөрэппитим. Онон билигин тугу санаабыппын, баҕарбыппын барытын оҥорон таһаарар кыахтаахпыттан үөрэбин.

Мастарыскыайтан — бөдөҥ хампаанньаҕа

— Туох сакаастар киирэллэрий?

— Сүрүннээн корпоративнай тэрээһиннэргэ аналлаах бэлэххэ сакаас хото киирэр. Ол курдук, оскуолалар, уһуйааннар, нэһилиэктэр олохтоох дьаһалталара, ис дьыала уорганнарын отделлара, култуура, успуорт тэрилтэлэрэ — сүрүн сакаасчыттарбыт. Оҥоһукпут тиэмэтинэн геральдическай стелалар, Аал Луук Мас, тэрилтэ тас көстүүтүн, оскуоланы бүтэрээччи, оскуолаҕа киирээччи, ыал буолуу, үбүлүөй араас бэлиэлэрэ буолаллар. Дьон бэйэлэрин баҕаларын анаан суруйан сакаастыыллар. Дьокуускайга сакаастыырга куоракка кэлиэхтэрин, ол сакаастарын төттөрү дойдуларыгар илдьиэхтэрин наада. Аны өрүс уҥуор олорор буолан, саас муус барыытын саҕана бэлэх саамай оҥоһуллар кэмигэр айан сырыыта тохтуур. Онон биһиги саамай наадалаах кэмҥэ баар буола түспүппүт. Уонна саха киһитэ боростуойдук төрөөбүт тылынан быһааран суруйан, тугу баҕарбытын чуо оҥорторон ылар буолан, биһиги оҥоһуктарбытын дьон сөбүлүүр.

…Анастасия уонна Уйбаан Семеновтар кэнэҕэс бу дьоҕус тэрилтэриттэн саҕалаан, улахан хампаанньа тэринэр санаалаахтар. Кинилэр дьыалабыай бэлэх оҥоһуктара номнуо “Саха сиригэр оҥоһулунна” бренд эргиэн былаһааккатыгар бэйэтин миэстэтин булла. Онон оҕолорун көрө олорор эдэр ийэ санаабыт санаата, торумнаабыт толкуйа олоххо киирэн, биисинэс эйгэтигэр эрэллээхтик хардыылаан эрэр. Семеновтар “Дьыалабыай бэлэх” мастарыскыайдара кэҥээн, сонун хайысхалаах улахан тэрилтэ буола үүнэригэр баҕарабыт.