Донбасс доброволецтарын сойууһун түөскэ кэтиллэр бэлиэлэрин туттардылар

«Аҕа дойдуну көмүскээччилэр» судаарыстыбаннай пуонда Саха сиринээҕи филиалыгар  байыаннай дьайыы кыттыылаахтарын уонна бэтэрээннэрин наҕараадалааһын үөрүүлээх тэрээһинэ буолла, диэн ЯСИА иһитиннэрэр.

Түөскэ кэтиллэр бэлиэлэри байыастарга байыаннай дьайыы бэтэрээнэ, Донбасс доброволецтарын сойууһун Саха сиринээҕи салаатын салайааччыта Аркадий Пудов туттарда.

Бу бэлиэнэн Донбасска буолбут түбэлтэлэргэ кыттыбыт чилиэттэр бэлиэтэнэллэр. Бу күн икки көрүҥнээх бэлиэ туттарылынна.

«Батастаах» бэлиэни Донбасс эйэлээх олохтоохторун көмүскээһиҥҥэ быһаччы кыттыбыт дьон, ону таһынан полевой подразделениелар миэдиктэрэ ыллылар.

«Батаһа суох» бэлиэни ЛНӨ уонна ДНӨ сирдэригэр гуманитарнай көмөнү хомуйуунан уонна тиэрдиининэн дьарыктаммыт доброволецтарга, ону таһынан Арассыыйа сиригэр доброволецтары эмтээһиҥҥэ көмөлөспүт мэдиссиинэ үлэһиттэригэр туттардылар. Ону таһынан тэрээһин чэрчитинэн Арассыыйа эмчиттэрин конфедерациятын өрөспүүбүлүкэтээҕи салаатыттан мэтээллэринэн уонна кырааматалыранын наҕараадалааһын буолла.

Бу наҕараадалары Арассыыйа эмчиттэрин конфедерациятын Саха сиринээҕи салаатын салайааччыта Вероника Семёнова туттарда. Кини байыаннай дьайыы кыттыылаахтарыгар уонна кинилэр дьиэ кэргэттэригэр чэбдигирдэр кабинеттары тэрийбит волонтер-эмчиттэр үлэлэрин бэлиэтээтэ.

«Биһиги бары билэбит — ханнык баҕарар кэмнэргэ доброволецтар уонна волонтердар ураты статустаах этилэр. Оттон байыаннай дьайыы усулуобуйатыгар «доброволец» диэн тыл өссө улахан суолталанар. Уолаттар өйдөөн-дьүүллээн быһаарынан, биир дойдулаахтарыгар биһиги кыраныыссаларбытын көмүскүүргэ көмөлөһө фроҥҥа бараллара», — диэн «Аҕа дойдуну көмүскээччилэр» пуонда Саха сиринээҕи филиалын салайааччыта Алексей Александров эттэ.