Донбасс… Таатта… Уонна сахалар ыраахтааҕыга…

«Чолбон» сурунаал алтынньытааҕы нүөмэригэр ааҕыҥ:

— «Улуу Кыайыы айымньылара» рубрикаҕа Константин Эверстов штрафбакка түбэспит саха саллаатын туһунан «Бары туруйаларга кубулуйбуттар» сэһэниттэн быһа тардыыны;

— Ойуур баһаарыныын туруулаһыы уонна идэҕэ бэриниилээх буолуу туһунан быыһааччы идэлээх Валерий Андросов «Кураан» кэпсээнин;

— Суруналыыс Роман Попов киһи чараас уйулҕатын ураннык арыйар «Хатыллыы» уонна «Ньуолах уонна кини иччитэ Мааппа» кэпсээннэрин;

— «Кынаттаах үрүмэччи маҥан аты миинэр» поэт Яна Байгожаева саҥа хоһоонноро;

— Москва куоракка олорор эдэр драматург Ангелла Попова-Кыраман грек уонна саха үһүйээннэрин ситимниир «Архыай. Улуу тойук номоҕо» буффонада-олоҥхотун бүтүүтүн;

— Көҥүлүн туруулаһар Донбасс дьонун-сэргэтин кутун-сүрүн ырытар тутар иэйиилэр уонна сэрии туһунан нуучча буойун суруйааччыта, саха литературатын доҕоро Алексей Полубота «Донбасстан иккиэйэх» кэпсээнин Лилия Иванова тылбааһыгар;

— Эдэр литератордар сүбэлэрин Тааттатаҕа айар экспедициятын блокноттарыттан Елизавета Мигалкина, Сардаана Корякина, Римма Крылова уо.д.а. саҥа айымньыларын;

— Биллэр архивист Наталия Степанова «Саха тойотторо ыраахтааҕыга бастакы сырыылара» ыстатыйатыгар 1676 сыллаахха «нуучча үрүҥ ыраахтааҕыта» туохтан сылтаан сахалары көрсүбүтүн;

— Кыраайы үөрэтээччи Ермолай Скрябин өрөбөлүүссүйэ, гражданскай сэрии, репрессия саҕанаҕы аймахтарын историятын туһунан «Илин хаҥаластар этибит…» ыстатыйатын;

— «Биллиилээх суруйааччылар биографиялара» рубрикаҕа эдэр сааһыгар суох буолбут литература кириитигэ Николай Рыкунов туһунан Рустам Каженкин ыстатыйатын;

Учуонай Антонина Винокурова эбээн омук чулуу киһитэ, норуот суруйааччыта Андрей Кривошапкин айар үлэтигэр бэлиэтээһиннэрин;

— «Оҕоҕун кытта аах» рубрикаҕа Иннокентий Эртюков «Үөрүү уонна хомолто», «Хатыҥ» хоһоонноро.

Күн – сири, «Чолбон» – саханы сырдатар.

Алгыһы кытта «Чолбон» сурунаал