Донецкайга Саха сирин байыастарыгар анал таҥас тигиэхтэрэ

Саха сириттэн сылдьар байыаннай сулууспалаахтарга эбии анал таҥаһы Донецкай Өрөспүүбүлүкэҕэ тигэр буолуохтара. Бу туһунан СӨ нэһилиэнньэҕэ куттал суох буолуутун хааччыйар судаарыстыбаннай кэмитиэт бэрэссэдээтэлэ Дмитрий Лепчиков иһитиннэрдэ.

Саха сирин суһалы ыстаабын бэрэстэбиитэллэрэ Донецкайга бара сылдьан, иис фабрикатыгар сылдьыбыттар.

— Биһиги байыаннайдарбытыгар бары ирдэбиллэргэ эппиэттиир хаачыстыбалаах, эбии анал таҥаһы тигэр туһуттан, бииргэ үлэлэһэргэ дуогабардастыбыт. Бу тэрилтэ ДНӨ араас куораттарыгар хас да сыахтардаах уонна биир кэмҥэ элбэх бородууксуйаны оҥорон таһаарар кыахтаах. Онон күннээҕигэ туттуллар анал таҥас, мал байыастарбытыгар көмө буолуохтара, — диэн кини эттэ.

Саха сириттэн сылдьар байыастар биир дойдулаахтарыгар махталларын тиэрдэллэр, түргэнник уонна түмсүүлээхтик көмө оҥороллорун бэлиэтииллэр. Билигин байыастарга Саҥа дьыллааҕы ас нобуорун, дойду сонуннарын кэпсиир хаһыаттары, о.д.а. тиэрдэ тураллар.