Дьону дьарыктаах оҥороору босхо үөрэтэллэр

Биһиги өрөспүүбүлүкэбитигэр “Демография” национальнай бырайыак чэрчитинэн “Дьарыктаах буоларга көмөлөһүү” федеральнай бырайыагы олоххо киллэрэр сыаллаах Идэҕэ урутаан бэлэмниир киин үлэлиир.

Күн бүгүн киин куорат сүүстэн тахса олохтооҕо маннык бырагыраамаларынан босхо үөрэнэ сылдьаллар: иистэнии, мобильнай видеография, кыламан үүннэрии, саҥаттан биисинэһи былааннааһын, кэммиэрчэскэй тэрилтэлэргэ бухгалтерскай учуоту оҥоруу, 1С бухгалтерия, буобар, биэкэр, алын мэдиссиинискэй сиэстэрэ, сиэстэрэ дьыалата. Бу күннэргэ Чурапчыга, Сунтаарга уонна Покровскайга иистэнии идэтигэр үөрэтэр куурустар саҕаланнылар. 2024 сылга үөрэммит, саҥа идэни баһылаабыт, квалификацияларын үрдэппит дьон ахсаана 50-тан таҕыста.

Бу бырайыак чэрчитинэн Идэҕэ урутаан бэлэмниир киин инбэлииттээх дьону, оҕолорун көрөн олорооччулары, 50 саастарыгар диэри уонна онтон улахан саастаахтары, уһуйааҥҥа сылдьар оҕолоох үлэлээбэт ийэлэри, 35-гэр диэри саастаах туһунан категорияҕа киирсэр эдэр дьону, байыаннай дьайыы кыттыылаахтарын уонна кинилэр дьиэ кэргэттэрин, үлэтэ суох дьону эбэтэр үлэттэн уһуллар кутталлаах дьону босхо үөрэнэллэригэр кыах биэрэр.

Билигин хас да бырагырааманан саҥа бөлөхтөрү хомуйан эрэллэр: иистэниигэ, мобильнай видеографияҕа, саҥаттан биисинэһи саҕалыырга, кыламаны үүннэриигэ, флористикаҕа. Интэриэһиргээбит дьон 89244602260 нүөмэргэ эрийэн эбэтэр маннык аадырыска тиийэн билсиэхтэрин сөп: Дьокуускай к., Крупская уул., 13, 1 этээс,  диэн Киин пресс-сулууспата иһитиннэрэр.