Дьону хаайа сытан үлэлэппит эр дьон тутулуннулар

Ньурбаҕа дьону кулуттааһынынан РФ Холуобунай кодексын 127.2 ыст. 2 ч. а пуунунан (использование рабского труда двух лиц с применением насилия и угрозой его применения) холуобунай дьыала тэриллибитэ. Туһааннаах быһылаанынан буруйдаахтар хаайылыннылар диэн СӨ Силиэстийэлиир кэмитиэтэ иһитиннэрдэ. 

Силиэстийэ дааннайдарынан, 30 уонна 51 саастаах эр дьону үлэлэтэргэ, көҥүл сылдьалларыгар бырааптарын кэспиттэр, кулут оҥосторго усулуобуйаны тэриммиттэр.

Эр дьон дьонтон тутулуктаах балаһыанньаҕа олорбуттар. Биирдэстэрин киһи олороругар сөп түбэспэт усулуобуйаҕа сырытыннарбыттар. Кини сүөһү көрөн олорбут, ол эрээри көҥүлүн хааччахтаабыттар.

Оттон иккис эр киһи үлэ биэрээччитин дьиэтигэр үлэлээн баран, муус устар 4 күнүгэр түгэни туһанан куоппут уонна көмө көрдөөбүтүн туһунан суруйан турабыт.

Билигин эмсэҕэлээччилэргэ мэдиссиинскэй көмө оҥоһуллар диэн СӨ Силиэстийэлиир кэмитиэтэ иһитиннэрэр.