Дьону саахалланар дьиэттэн көһөрүүнү саҥа национальнай бырайыак салгыаҕа

Саха сиригэр саахалланар туруктаах 2022 сыл тохсунньу 1 күнүгэр диэри билиниллибит дьиэлэртэн дьону көһөрүү “Олоххо наадалаах инфраструктура” саҥа нацбырайыак чэрчитинэн саҕаланыаҕа.

Бу туһунан кулун тутар 7 күнүгэр СӨ Бырабыыталыстыбатын түмүктүүр отчуотун мунньаҕар эрэгийиэн бырабыыталыстыбатын бэрэссэдээтэлэ Кирилл Бычков быһа эпииргэ иһитиннэрдэ.

2017 сыл тохсунньу 1 күнүгэр диэри саахалланар туруктааҕынан билиниллибит дьиэлэртэн дьону көһөрүү иккис түһүмэҕэ бу сылга түмүктэниэҕэ. Оттон Саха сирэ дойду үрдүнэн саамай элбэх маннык дьиэлээх эрэгийиэнинэн буолар.

“Иккис түһүмэххэ дьону туох баар саахалланар туруктаах дьиэттэн көһөрөр бырагыраамабытын  толорботубут. Онон сибээстээн, дойду Бэрэсидьиэнэ “Олоххо наадалаах инфраструктура” диэн саҥа нацбырайыагы биллэрбитэ, бу манан 2022 сыл тохсунньу 1 күнүгэр диэри саахалланар туруктааҕынан билиниллибит дьиэлэртэн дьону көһөрүү салҕаныа. Саха сирин тутууну ыытар комплекса сылга 750 тыһ. кв.м. киллэрэр кыахтанна. Маннык кыамтанан биһиги көһөрөр бырагыраама үһүс түһүмэҕин кыайыахпыт. Чугастааҕы кэмҥэ Госдуумаҕа Олох-дьаһах кодексатыгар уларытыылары  киллэриэ, онно бырагыраама саҥа бэрээдэгэ тахсыаҕа», — диэн бэлиэтээтэ Кирилл Бычков.