Уус Алдаҥҥа урбаанньыт бэтэрээннэргэ көмөлөһөр

Кырдьаҕастар  аан дойдутааҕы күннэринэн  Уус Алдан улууһун “Сыырдаах” хааччахтаммыт эппиэтинэстээх уопсастыба эргиэнин дириэктэрэ Владимир Стрекаловскай «Аал уот» бэтэрээннэр түмсүүлэригэр көхтөөхтүк кыттар.

Бу да сырыыга кини бырааһынньыгынан соҕотох эбээлэргэ «Дойдум аһа» бородууксуйатыттан соһуччу бэлэх оҥорон олус үөртэ, соһутта. Ол курдук,  Александра Никитина:

«Күһүҥҥү эт ас кырыымчык кэмигэр Владимир Владимирович болҕомтотун уурбутуттан соһуйан эрэ хааллым. Мин бөһүөлэк киинигэр турар кини салайар «Сардаана» диэн тэрилтэтиттэн өрүү араас ас-үөл, күннээҕи туттар табаары атыылаһабын. Сардаана Борисова сэбиэдиссэйдээх  маҕаһыын куруук ырааһа, бородуукта өйдөнүмтүөтүк сааһыланан турара, үлэһиттэр хааччыйыыларын култуурата үрдүгэ миигин өрүү үөрдэр», —  диэн  кэлэктиипкэ махталын тириэртэ.

Онтон Мария Татаринова: “Владимир Стрекаловскай курдук салайааччылар баар буоланнар, кырдьар сааспытын уһатабыт, олох сайдар”, — диэн этиитигэр толору сөбүлэстим. Кырдьык, кыра биэнсийэлээх соҕотох эбээлэргэ олус үөрүүлээх буоллаҕа. Агафья Перевалова этэринэн,  кырдьаҕастар ааспыт  дэкээдэлэригэр бибилэтиэкэҕэ  буолбут тэрээһиҥҥэ Владимир Владимирович араас суол бородуукта бирииһи туруоран,  эмиэ билимиэн курдук тотоойу ас түбэһэн үөрбүтүн бэлиэтиир. Дьону үөрдэ сылдьыахха.

Ульяна БУРНАШЕВА