«Дорҕоон дойду» бэстибээл – оҕо бырааһынньыга

«Азия оҕолоро» норуоттар икки ардыларынааҕы оонньуулар чэрчилэринэн Дьокуускай куоракка элбэх култуурунай  тэрээһин  ыытыллар. Күн аайы киин куорат болуоссаттарыгар сарсыардаттан киэһэ хойукка диэри ырыа-тойук дьиэрэйэр.

Орджоникидзе болуоссатыгар «Дорҕоон дойду» оҕолор вокальнай-инструментальнай бөлөхтөрүн бэстибээлэ буолан ааста. Өрөспүүбүлүкэ үгүс улуустарыттан элбэх айар дьоҕурдаах оҕо кэлэн кытынна. Бу тэрээһин туһунан музыкант, педагог, биллиилээх мелодист, СӨ култууратын, СӨ үөрэҕириитин туйгуна Николай Андросов кэпсиир:

— Маннык киэҥ хабааннаах бэстибээл оҕолорго анаан аан бастакытын Олоҥхо тыйаатырын «Дорҕоон дойду» устуудьуйа салайааччыта, тыыннаах дорҕоону тарҕатааччы, СӨ култууратын туйгуна Герасим Павлов көҕүлээһининэн тэрилиннэ. Барыта алта бөлөх кытынна.

Мин онус сылбын оскуолаҕа учууталлыы, онтон тоҕус сылын оҕолору вокальнай-инструментальнай ансаамбылга дьарыктыы сылдьабын. Кэнники Анатолий Босиков ыытар ВИА-лар бэстибээллэрин көрөммүн испэр оҕолорго тэрийэр тоҕо сатаныа суоҕай диэммин, оҕолору тыыннаах муусукаҕа дьарыктыыр буолубутум. Биһиги Хатаспыт орто оскуолатыгар эбии куорпус тутуллан, саҥа аппаратура атыылаһыллан, дьарыктанар хостонон үөрүүбүт үгүс. Онон оҕолорбут сылы быһа дьарыктанан бу бэстибээлгэ кытыннылар. Бу бэстибээл уопсайынан, тыа сирин оҕолоро бэйэлэрин истэригэр хаатыйаланан хаалбакка, сайдалларыгар, тахсалларыгар киэҥ түһүлгэнэн, айар дьоҕурдаах оҕолор бырааһынньыктарынан буолар диэхпин баҕарабын. «Айар суол» уонна «Кэскил» бөлөхтөрү тэрийэн киэҥ көрүүгэ таһаардым. «Кэскил» диэн сайыҥҥы оҕо лааҕырын тэрийэн үлэлэтэ сылдьабын, онно биир ый дьарыктаабыт оҕолорум кэлэн кытыннылар.

Саха сирин оҕо бастыҥ вокальнай-инструментальнай бөлөхтөрө кэлэн бэстибээл үрдүк таһымнаахтык ааста. Ол курдук Орто Халыма улууһуттан СӨ култууратын, СӨ үөрэҕириитин туйгуна Владимир Киприянов салайааччылаах «Эрэл» бөлөх, Мэҥэ Хаҥаластан урукку «Сэргэ» бөлөх вокалиһа, ырыаһыта Анатолий Босиков салайааччылаах «Айкуо» бөлөх, Чурапчы Сылаҥыттан дьиэ кэргэн «Халлааҥҥа үрдэл» бөлөҕө, Сунтаар улууһун Маар Күөлүттэн Владимир Константинов салайааччылаах «Уран Куо» бөлөх, ыраах Усуйаана улууһун Туматыттан Николай Слепцов салайааччылаах «Тумат» бөлөх, Хатастан мин салайар «Айар суол» бөлөҕүм кытыннылар. Култуура министиэристибэтэ хас биирдии бөлөххө 40-нуу тыһыынча суумалаах сертификаты туттарда. Ити харчынан бөлөх инники сайдарыгар, ким аппаратура, ким инструмент ыларыгар туһаныа дии саныыбын. Итини таһынан бэстибээл кыттыылаахтарыгар барыларыгар «Дорҕоон дойду» диэн суруктаах футболка уонна бейсболка биэрэннэр, оҕолор үөрүүлэрэ үрдээтэ.