Доруобуйа харыстабылыгар аналлаах дэкээдэ саҕаланна

Аан дойдутааҕы доруобуйа харыстабылыгар аналлаах дэкээдэ үлэтэ саҕаланна.

Арассыыйаҕа Дьиэ кэргэн, Саха сиригэ Оҕо саас сылларынан, муус устар 1-10 күннэригэр, СӨ доруобуйа харыстабылын министиэристибэтэ доруобуйа харыстабылыгар аналлаах дэкээдэни тэрийэн ыытар. Дэкээдэ иитинэн нэһилиэнньэҕэ доруобуйа дьаарбаҥката, мэдиссинэ тэрилтэлэригэр аһаҕас аан күннэрэ, үлэ кэлэктииптэригэр чөл олох, чэбдигирии тиэмэлэринэн лекторийдар, доруобуйа оскуолалара, доруобуйаҕа эппиэтинэстээх сыһыаннаах буоларга төрөппүттэргэ үөрэхтэр, оскуолаларга #ПРОЗДОРОВЬЕ» доруобуйа уруоктара ыытыллаллар.

Арктика улуустара да туоратыллыбатылар. Ол курдук, мобильнай биригээдэлэр исписэлиистэрэ арктическай оройуоннарга нэһилиэнньэ доруобуйатын көрө-истэ айанныыр былааннаахтар.

Өрөспүүбүлүкэтээҕи уопсастыбаннай доруобуйа уонна мэдиссиинискэй сэрэтии киинэ Хаҥалас улууһун киин балыыһатын кытта муус устар 2 күнүттэн Покровскайга «Здоровье детей в наших руках» диэн пуорум ыыталлар. Тэрээһин иитинэн «Межведомственное взаимодействие в интересах охраны здоровья подрастающего поколения» төгүрүк остуол, «Актуальные вопросы диспансеризации» мэдиссиинэ үлэһиттэригэр сэминээр, оҕо быраастара кыттыылаах нэһилиэнньэҕэ бүттүүнүгэр доруобуйа дьаарбаҥката, о.д.а. былааннаналлар. Эргиччи туһалаах буолан, дьон-сэргэ күүтэр. Өктөмҥө П.И.Шадрин аатынан оскуолаҕа, Покровскайга 3 №-дээх оскуолаҕа, «Айтыын» цифровой технология кэллиэһигэр лиэксийэлэр, «Марафон здоровья» квест оонньуу ыытыллыахтара.

Муус устар 2-5 күннэригэр Дьокуускайга Уу тырааныспарын институтун 3-4  кууруһугар үөрэнэр устудьуоннарга, Дьокуускай куорат дьаһалтатын үлэһиттэригэр, 8 №-дээх, «Родничок» уонна «Солнышко 40 №-дээх уһуйааннарга «Спасти жизнь может каждый!» диэн тэрээһин былааннанар.

«Куруһаала» эргиэн дьиэтигэр муус устар 3-5 күннэригэр «МедЭкспо. Здоровье и красота» эрэгийиэннэр икки ардыларынааҕы быыстапкаҕа дьон-сэргэ түмсүө. Манна ким баҕалаах кэлэн невролокка, дерматолокка, психиатр-нарколокка, килиниичэскэй психолокка, фтизиатрга, офтальмолокка сылдьыан, сүбэ-ама ылыан сөп. Маны таһынан ВИЧ, В, С гепатикка, сифилискэ, сэлликкэ  экспресс-тестирование баар буолар. Хааннарын баттааһынан бэрэбиэркэлэтиэхтэрин, о.д.а. көрдөрүнүөхтэрин сөп.

Муус устар 5 күнүгэр ХИФУ устудьуоннара КФЕН уораҕайыгар «Будь здоров!» Бүтүн Арассыыйатааҕы аахсыйаны күүтэллэр. Тэрээһин иитинэн Н.Д.Неустроев аатынан Smart бибилэтиэкэҕэ «Здоровая среда» бырайыагынан 9, 16, 23, 25 №-дээх оскуола уонна Сахаполитехническэй кэллиэс бэрэстэбиитэллэрэ «Время быть здоровым!» билиини-көрүүнү тургутар брейн ринг оонньууга күөн көрсүөхтэрэ. «Путь к здоровью, стройности, красоте» диэн доруобайаҕа туһалаах ас-үөл марафона салҕанар.

Доруобуйа — киһи баар-суох баайа. Чөл олоҕу тутуһан доруобуйабытын харыстыаҕыҥ.

СӨ Ил Дарханын уонна Бырабыыталыстыбатын пресс-сулууспата