Доруобуйа харыстабылын миниистирин урукку солбуйааччыта уонна «Диомед» ХЭУо дириэктэрэ буруйдара суоҕунан билиннилэр

Бу сыл от ыйын 18 күнүгэр Дьокуускай куорат суута СӨ доруобуйа харыстабылын миниистирин урукку бастакы солбуйааччытыгар уонна «Диомед» ХЭУо генеральнай дириэктэригэр РФ Холуобунай кодексатын 159-с ыстатыйатын 4-с чааһынан (улахан кээмэйдээх түөкүннээһин) уонна 285-с ыстатыйатын 1-с чааһынан (дуоһунас боломуочуйатын аһара туһаныы) буруйданар холуобунай дьыаланы көрдө. Бу туһунан Дьокуускай куораттааҕы суутун пресс-сулууспата иһитиннэрэр.

Силиэстийэ уорганнара өрөспүүбүлүкэ доруобуйа харыстабылын миниистирин урукку солбуйааччытын «Диомед» ХЭУо салайааччытын кытта куомуннаһан,  өрөспүүбүлүкэ Ил Дарханын уонна СӨ Доруобуйа харыстабылын министиэристибэтин атын дуоһунастаах дьонун албыннаан, «Диомед» кытта мэдиссиинискэй тэрили (кислород концентратордарын) аҕалыыга судаарыстыбаннай хантараак түһэрсэн, СӨ Доруобуйа харыстабылын министиэристибэтигэр улахан кээмэйдээх хоромньуну оҥорбуттарынан буруйдууллара. Итини таһынан, силиэстийэ барылынан тэрил сыаната быдан үрдэтиллибитинэн ааҕыллыбыта. Ол эрээри, суут дьыаланы ырытар кэмигэр  тэрил сыаната улаханнык үрдэтиллибитин бигэргэтэр дьиҥнээх дакаастабыллары булбата. Буруйдуур түмүккэ, суукка олорооччулар дьайыылара ханнык эмэ юридическай эбэтэр физическэй сирэйдэр атыылаһыы процедураларыгар кыттар бырааптарын хайдах эмэ хааччахтаабыта ыйыллыбатах уонна буруйдуур өрүтүнэн дакаастаммата. Ону таһынан, күрэстэһиини хааччахтааһын чуолкайа суох, атыылаһыыга кыттааччылар ханнык бырааптара кэһиллибитэ уонна бу кэһиилэр хайдах көстүбүттэрэ чопчу ыйыллыбатах.

Суут быһаарбытынан, буруйдааһын сабаҕалааһыҥҥа олоҕурар, дьиҥнээх дакаастабылларынан бигэргэтиллибэтэх, онон буруйдуур бириигэбэр төрүөтэ буолар кыаҕа суох. Дьокуускайдааҕы куорат суута миниистир урукку солбуйааччытын уонна «Диомед» ХЭУо дириэктэрин дьайыыларыгар буруй састааба суоҕунан буруйдара суоҕунан билиннэ. Суут бириигэбэрэ сокуоннай күүһүгэр киирэ илик.