Доруобуйа харыстабылын министиэристибэтэ Эргэ Табаҕаҕа эмсэҕэлээбит оҕолор туруктарын туһунан иһитиннэрдэ

Доруобуйа харыстабылын министиэристибэтэ бэҕэһээ Эргэ Табаҕаҕа киириигэ суолга эмсэҕэлээбит, сокуоннай саастарын туола илик оҕолор туруктарын туһунан иһитиннэрдэ.

“Атырдьах ыйын 15 күнүгэр сокуоннай сааһын туола илик үс оҕону суһал көмө сулууспата Өрөспүүбүлүкэтээҕи 1-кы нүөмэрдээх балыыһаҕа – Мэдиссиинэ национальнай киинин педиатрияҕа киинигэр киллэрбитэ. Быраастар көрөн баран икки эмсэҕэлээччини балыыһаҕа киллэрбиттэрэ, биир оҕону тастан эмтэнэргэ ыыппыттара. Күн бүгүн 17 саастаах хас да сиринэн эчэйиилээх оҕо ыарахан туруктааҕа бэлиэтэнэр. Эмсэҕэлээбит оҕолорго мэдиссиинэ өттүттэн ирдэнэр туох баар көмө оҥоһуллар”, – диэн иһитиннэрдилэр.