Доруобуйа харыстабылын салаатын каадырынан хааччыйыы болҕомтоҕо ылылынна

«Дойду бэрэсидьиэнэ Владимир Путин пресс-кэмпириэнсийэтин  сүрүн түгэннэриттэн биир дьоһуннаахтарынан, мин санаабар, доруобуйа харыстабылын салаатын каадырдарынан хааччыйыы боппуруоһа буолла, – диэн СӨ доруобуйа харыстабылын миниистирэ Елена Афанасьева иһитиннэрдэ.

«Чуолаан, эһиил  кулун тутар 1 күнүттэн бүддьүөт суотугар үөрэнэр миэдик-устудьуоннар ординатура кэнниттэн тустаах кэм устата Мэдиссиинэ Булгуччулаах страховкатын тиһигинэн  мэдиссиинэ тэрилтэлэригэр үлэлиир эбээһинэстэниэхтэрэ. Бу доруобуйа харыстабылын салаатыгар каадыр тиийбэт кыһалҕатын быһаарыаҕа, ону биһиги өрөспүүбүлүкэбит  уопута бигэргэтэр. Саха сирэ бу суолу тутуспута ыраатта. Бүддьүөт суотугар уонна тус сыаллаах үөрэнэр устудьуоннары үлэҕэ анааһын үөрүйэҕэ биһиэхэ баар буолбута хас да сыл буолла уонна үчүгэй түмүктэри биэрдэ. Онуоха биир өттүнэн миэдиктэргэ наадыйар тэрилтэлэри үлэһитинэн хааччыйабыт, атын өттүнэн ыллахха,  саҥа үлэлиир быраастар тугунан да сыаналаммат үөрүйэҕи ылаллар», – диэн Елена Афанасьева пресс-кэмпириэнсийэ кэмигэр доруобуйа харыстабылыгар сыһыаннаах наһаа элбэх ыйытыы бэриллибэтэҕэ үчүгэй көрдөрүү буоларын бэлиэтээтэ.

Кэнники сылларга дойдуга уонна Саха Өрөспүүбүлүкэтигэр доруобуйа харыстабылын салаатыгар үгүс үлэ ыытылынна. Онуоха улахан оруолу «Доруобуйа харыстабыла» уонна «Демография», онтон билигин «Уһун уонна көхтөөх олох» национальнай бырайыактар ыллылар.