Доруобуйа национальнай күнэ: доруобуйаҕар болҕомтолоох буол

Олунньу 27 күнүгэр Хаҥалас улууһугар Доруобуйа национальнай күнүгэр ыытыллыбыт үбүлүөйдээх пуорумҥа 1500-тэн тахса киһи кытынна.

«Саха Өрөспүүбүлүкэтигэр Доруобуйа Национальнай күнэ: 25 сылга үгэстэр уонна ситиһиилэр» пуорум «Уопсастыбаннай доруобуйаны бөҕөргөтүү -– биһиги уопсай сорукпут» панельнай сиэссийэттэн саҕаланна.

«Бүгүҥҥү тэрээһин Саха сирин нэһилиэнньэтин доруобуйатын бөҕөргөтүүгэ улахан суолталаах. Биһиги бу хайысхаҕа биллэр ситиһиилэр баалларынан -– Саха сирин дьонун олоҕун уһуна 73 сааска тиийбитинэн киэн туттабыт. Ону сэргэ, өрөспүүбүлүкэ төрөөһүн көрдөрүүтүгэр дойду эрэгийиэннэрин ортотугар инники сылдьар», -– диэн СӨ Доруобуйа харыстабылын министиэристибэтин кылаабынай терапева Айталина Торонова бэлиэтээн эттэ.

Бу күн мэдиссиинэ үлэһиттэригэр диспансеризация боппуруостарыгар аналлаах сэминээр буолла. Дьокуускай куорат 2 №-дээх балыыһатын кылаабынай бырааһа, «Саха сиринээҕи мэдиссиинэ балаатата» эрэгийиэннэҕи уопсастыбаннай тэрилтэ бэрэссэдээтэлэ Саргылана Васильева: «Биһиги сэбиэскэй кэмҥэ диспансеризация диэн лозунунан мэдиссиинэ чинчийиилэригэр кыттарбыт. Билигин ону превентивнай мэдиссиинэ диэн ааттыахха сөп. Мэдиссиинэ булгуччулаах страховкатынан диспансеризация босхо оҥоһуллар. Бэйэ поликлиникатыгар доруобуйаны көрдөрүү, чинчиттэрии сүрэх-тымыр ыарыылара, саахарынай диабет сайдар кутталын биллэ аҕыйатар уонна араак ыарыытын эрдэ булан эмтэнэргэ көмөлөһөр. Диспансеризация чуолаан 40  саас кэнниттэн хайаан да наадалаах. Тоҕо диэтэххэ, бу саастан ыла сүрэх-тымыр ыарыытын куттала баар буолар. Бэйэҕитигэр бириэмэтэ ордорунан, олорор сиргитинэн поликлиникаҕа кэлэн көрдөрүнүҥ», -– диэн диспансеризация кыттарга эттэ.

Эмиэ бу күн Покровскай куоракка Успуорт дыбарыаһыгар буолбут доруобуйа дьаарбаҥкатыгар 320 киһи доруобуйатын көрдөрүннэ. Аахсыйаҕа Хаҥалас улууһун Оройуоннааҕы киин балыыһатын, Уопсастыбаннай доруобуйа киинин, СПИД-Киин, тирии ыарыыларын, венерология өрөспүүбүлүкэтээҕи диспансерын быраастара кытыннылар.
«Саргы түһүлгэтэ» норуот айымньытын дьиэтигэр саастаах көлүөнэҕэ анаммыт «Уһун үйэлэнии саҕахтарын арыйан» аахсыйаҕа 84 киһи кыттан, элбэҕи туһанна.
Доруобуйа, чөл олох оҥкула оҕо эрдэхтэн оҥоһуллар. Ол да иһин, үөрэнээччилэргэ уонна устудьуонарга анаммыт «Чөл олох көлүөнэтэ», «Чэгиэн ыччат -– күүстээх өрөспүүбүлүкэ» тэрээһиннэргэ 900 киһи көхтөөхтүк кытынна.

Кыра уонна обургу саастаах оҕолорго  анаммыт «Доруобай аһылык кистэлэҥнэрэ», «Электроннай сигареталар -– обургу оҕолорго угаайы», «Репродуктивнай доруобуйа» диэн интерактивнай бырагыраамалар, лиэксийэлэр, мэдиссиинэ кэллиэһин устудьуоннарын маастар-кылаастара, VR-ачыкылаах оонньуулар, «Доруобуйа марафона» квест-оонньуулар туһаттан атыны аҕалбаттарыгар тэрийээччилэр эрэнэ хааллылар.