Доруобуйабыт – бэйэбит илиибитигэр

Олунньу ый 11 күнүгэр, доруобуйа күнүн чэрчитинэн, Үөһээ Бүлүү улууһун Мэйик нэһилиэгин олохтоох бибилэтиэкэтигэр, сарсыардаттан бэрт эрдэттэн сонун, сэргэх тэрээһиннэр саҕаланнылар.

Улуус киин балыыһатыттан тиис оҥорооччулар уонна эмтиир физкултуура инструктора тиийэн үлэлээн, дьон махталын ыллылар.

Ол курдук сүрэх уонна тымыр ыарыыларын сэрэтэр туһунан лиэксийэлэр, ону тэҥэ хамсаныы, тыыныы көмөтүнэн доруобуйаны көннөрүү сэрээккэтэ буолан ааста. Лиэксийэни уонна доруобуйаны көннөрөр хамсаныылары СӨ Доруобуйатын харыстабылын туйгуна, сиэстэрэ идэлээх Светлана Алексеева ыытта. Кини Стрельникова ньыматынан тыыныыга дьарыктаныыны көрдөрбүтүн дьон-сэргэ олус интэриэһиргээн иһиттэ, хамсаныыларын тэҥҥэ оҥорон көрөн чахчы даҕаны астынна уонна биһирээтэ.

Хас күн аайы дьарык гынан, ити хамсаныылары оҥорорбут эбитэ буоллар, доруобуйабыт биллэ тупсуо эбит диэн Мэйик олохтоохторо астыммыттарын биллэрдилэр. Светлана Тимофеевна бибилэтиэкэҕэ эрэ сылдьыытынан муҥурдаммакка, алын сүһүөх уонна орто сүһүөх кылаас оҕолорун кытта көрүстэ, оҕолор олус сэҥээрэн иһиттилэр, элбэх сүбэ-ама ыллылар.

Кини эбиэт кэннэ нэһилиэнньэни кытта хат көрсөн, туһалаах эрчиллиилэри көрдөрөн, элбэх дьон сэҥээриитин ылла. Инникитин да медик идэлээхтэрбит, доруобуйаны көрүнэ сылдьалларын курдук элбэх туһалаах сүбэлэри кэлэн биэрэллэрэ буоллар диэн баҕа санааларын тиэрдэллэр. Светлана Алексеева этэринэн, хас биирдии киһи доруобуйата бэйэтиттэн тутулуктаах, кырдьыга да, сөпкө тыынан, эппитин-хааммытын чэбдигирдэн, сөптөөх аһылыгы аһаан, доруобуйабытын бэйэбит көрүнүөх тустаахпыт. Бу курдук, Мэйик нэһилиэгэр, биир эмиэ сэргэх оптуорунньук –доруобуйа күнэ ааста.