Доруобуйаларыгар хааччахтаах оҕолор кэнсиэрдэрэ сэргэхтик ааста

Бу күннэргэ Үөһээ Бүлүү улууһугар «Көмүскэл» доруобуйаларыгар хааччахтаах оҕолоох төрөппүттэр түмсүүлэрэ оҕолоругар анаан кэнсиэр оҥордулар. Кэнсиэргэ уопсайа 21 оҕо кытынна.

Кэнсиэргэ Дьокуускай куоракка үөрэнэр доруобуйаларыгар хааччахтаах оҕолор – Максим Васильев «Мама» диэн ырыаны этэр хамсаныынан (жестикуляция) ыллаата, оттон Вася Саввинов байыаннай дьайыыга сылдьан сырдык тыына быстыбыт убайыгар анаан хоһоон аахта. «Көмүскэл» түмсүү ийэлэрэ симэхтэри кэтэннэр хааман-сиимэн көрдөрөн, «Ыллыкчаан» оҕо уһуйаанын уонна Улуустаааҕы оҕо айымньытын киинин кырачаан иитиллээччилэрэ үҥкүүлээн-ыллаан тэрээһини өссө киэргэттилэр.

Көхтөөх, ситиһиилээх оҕолорго улуустааҕы Култуура уонна духуобунай сайдыы департаменын салайар Айталина Мойтохонова грамоталары туттарда.  Оттон көхтөөх ийэлэргэ  Үөһээ Бүлүү улууһун социальнай боппуруостарга уонна дьиэ кэргэн бэлиитикэтигэр баһылыгы солбуйааччы Анна Уларова Махтал суруктары туттартаата.

Тэрээһин кэмигэр оҕолор бэйэлэрэ олордубут арассаадаларын уонна төрөппүттэрин кытары тикпит, уруһуйдаабыт шоппер-суумкаларын итиэннэ уран тарбахтаах иистэнньэҥ ийэлэр оҥорбут оҥоһуктарын, астаабыт бурдук астарын атыылаатылар.

Ону сэргэ кэнсиэр быыһыгар төрөппүттэр уонна оҕолор оонньуу ыыттылар. Ол курдук,  оонньууга Аэлита Захарова бэйэтэ астаабыт тордун, ротангтан кашпотун, Анна Таас уонна Дьокуускай куорат коррекционнай оскуолатын 6-с кылааһын үөрэнээччитэ Дайаана Лепчикова бэйэлэрэ оҥорбут оҥоһуктарын, төрөппүттэр «Атоми» хампаанньа бородууксуйатын, «Романовский двор» тутуу матырыйаалын маҕаһыына – шуруповерт, «Детейлинг Катрин» тату салона – сэртипиккэт, Туйаара Дмитриева – бэйэтэ баайбыт сайыҥҥы бэргэһэтин, Кэскил Васильев маһынан оҥорбут эт кырбыыр дуоскатын, о.д.а. туруорбуттар.

«Сэргэх тэрээһин буолан ааста, оҕолор да, төрөппүттэр да олус астыннылар. Быйыл түмсүүбүтүгэр 4 выпускниктаахпыт, бастатан туран бу оҕолорбутун эҕэрдэлээтибит. Выпускниктарга бэлэх оҥорорбутугар түмсүүгэ баар төрөппүттэр, Үөһээ Бүлүү улууһунааҕы Дьахталлар сэбиэттэрэрин чилиэннэрэ Вера Хобусарова, Ирина Потапова, кэнсиэри оҥорорбутугар Норуот айымньытын киинин дириэктэрэ Анна Герасимова улаханнык көмөлөстүлэр. Онон күүс-көмө буолбут дьоҥҥо барҕа махталбытын этэбит!», — диэн Зария Мойтохонова махталын тириэрдэр.