Инбэлииттэр декадаларын чэрчитинэн, Доруобуйаларыгар хааччахтаах оҕолору реабилитациялыыр өрөспүүбүлүкэтээҕи киин уонна Саха цииркэтэ үгэскэ кубулуйбут тэрээһиннэрин ыыттылар.
Бу күн цииркэ дьиэтин-уотун туран биэрдэ. Күнүс 2 чаастан оҕолорго араас маастар-кылаастар, төрөппүттэргэ консультациялар буоллулар, логопед, дефектолог, невролог, уо.д.а. исписэлиистэр үлэлээтилэр. Манна ханнык баҕарар төрөппүт оҕотун илдьэ кэлэн, киин үлэтин-хамнаһын билсиэн, оҕотун оонньотуон, дьарыктыан, сүбэ-ама ылыан сөп. Сүрүннээн оҕолору оонньотон, уруһуйдатан, араас дьарыктары ыытан, сайыннардылар. Ол иһин олус элбэх киһи сырытта, цииркэ уораҕайа оҕо саҥатынан оргуйан олордо.
Бу кэнниттэн Доруобуйаларыгар хааччахтаах оҕолору реабилитациялыыр уонна киин коррекционнай оскуола иитиллээччилэрэ, цииркэ уонна эстрада артыыстара кыттыылаах кэнсиэр буолла. Артыыстар Анатолий Горохов, Хатылаевтар, Джида, Айсен Аммосов, Мирослав Егоров, Ирина Дускулова, уо.д.а. аһымал аахсыйа сиэринэн, кэлэн ыллаатылар. Коррекционнай оскуола оҕолоро олус талааннаахтарын, бэлэмнээхтэрин көрдөрдүлэр, артыыстары кытары тэҥҥэ тахсан, ыллаатылар-үҥкүүлээтилэр. Бэл диэтэр, реабилитациялыыр киин кырачаан иитиллээччилэрэ тахсан хоһоон аахтылар, үҥкүүлээтилэр. Бу кинилэргэ улахан кыайыы буоларын бэлиэтээн, көрөөччүлэр ытыстарын тыаһын харыстаабатылар.
СӨ Үлэҕэ, социальнай сайдыыга миниистирэ Елена Волкова кэлэн, оҕолору эҕэрдэлээтэ, доруобуйаны, ситиһиилэри, төрөппүттэрин үөрдэ-көтүтэ сылдьалларыгар, Саҥа дьылга баҕа санаалара туоларыгар баҕарда. “Оттон биһиги, улахан дьон, эһиги саҥаҕа үөрэнэргитигэр, кыаххытын, дьоҕургутун арыйаргытыгар бары усулуобуйаны оҥоро сатыахпыт”, — диэн кини эрэннэрдэ.
Цииркэ дириэктэрэ Сергей Расторгуев киин попечителэ буоларынан, өрүү көмөлөһөр. Киин бырааһынньыктарын цииркэ артыыстара куруук киэргэтэллэр.
Доруобуйаларыгар хааччахтаах оҕолору реабилитациялыыр өрөспүүбүлүкэтээҕи киин төрдүс сылын үлэлиир. 2018 сыллаахха аан бастаан маннык тэрээһини ыыппыта. Пандемия мэһэйдээн кэнники сылларга тэйиччиттэн ыытыллыбыта эрээри, быйыл элбэх оҕону, төрөппүттэри мунньан, кинилэргэ үтүө санаа бырааһынньыгын тэрийдилэр.
Киин дириэктэрэ Зинаида Максимова кэпсииринэн, сылга 2 тыһыынчаттан тахса оҕо төрөппүттэрин кытары кэлэн дьарыктаналлар. Киин үлэтин-хамнаһын сүрүн сыала – оҕону инбэлиит буоларга тиэрдибэккэ, эрдэттэн кэһиллиитин булан, дьарыктаан, эмтээн, сайыннарыы. Оҕо сайдыыта киһи кэтэспитин курдук буолбатаҕына, төрөппүттэр мунаараллар, хайдах буолуохтарын билбэттэр. Онон исписэлиистэр төрөппүттэри эмиэ үөрэтэллэр, сүбэлииллэр, дьарыкка бииргэ сырытыннараллар. Оҕону уопсастыбаҕа сылдьарга, саастыылаахтарын кытары биир тылы буларга, сатаан саҥарарга, кэпсэтэргэ, алтыһарга, о.д.а. үөрэтэллэр.
Кииҥҥэ сүүстэн тахса үлэһит баар. Эмтиир физкултуураттан, массаастан саҕалаан, мэдиссиинэ үлэһиттэригэр тиийэ үлэлииллэр. Психологтар оҕо сайдыытын чинчийэн баран, сааһыгар сөп түбэһиннэрэн сайдар суолун торумнууллар. Неврологтар, логопедтар оҕо саҥатын сайыннараллар. Онон маннык киин Дьокуускайга баара төрөппүттэргэ да, оҕолорго да олус туһалаах.
Үөдүгэй нэһилиэгэр түргэнник ситэр салаанан дьарыктанар дьон ахсаана сыллата эбиллэр. Бүгүн өр сылларга дьиэ көтөрүн…
Профилактическай тэрээһиннэр холбоһуктаах дьаһалларын кэмигэр Өлүөхүмэ оройуонугар ИДьМ учаастактааҕы боломуочунайдара уонна ИДьМ подразделениеларын үлэһиттэрэ арыгы…
Бүгүн, кулун тутар 14 күнүгэр, СӨ Тас сибээстэргэ уонна норуоттар дьыалаларыгар министиэристибэтин кэллиэгийэтин Саха сирин…
ИДьМ 2 №-дээх полициятын дьуһуурунай чааһыгар суотабай төлөпүөнү уорбуттарын туһунан эр киһи сайабылыанньа суруйбут. Эр…
Саха сиригэр анал байыаннай дьайыы кыттыылаахтарын дьоруойдуу быһыыларын үйэтитэр сыаллаах мемориальнай комплекс бырайыагын оҥорууга архитектурнай…
2025 сыл саҕаланыаҕыттан Саха сириттэн 50 массыынаны анал байыаннай дьайыыга тиэртилэр. Тиэхиникэни кытта байыастарга чугас…