Мэҥэ Хаҥаласка Үп миниистирин кытта байыас мэдиссиинэ эбийиэктэрин көрдүлэр

«Саха сирэ – Дьоруойдар дойдулара» каадыры бэлэмниир бырагыраама кыттыылааҕа, эмчит идэлээх, байыаннай дьайыы бэтэрээнэ Назар Петров уонна СӨ Үпкэ миниистирин солбуйааччы Николай Старостин Мэҥэ Хаҥаласка үлэлээтилэр.

Кинилэри кытта мэдиссиинэ көмөтүнэн чөлгө түһэрии уонна успуорт мэдиссиинэтин киинин кылаабынай бырааһа Кюнна Назарова, СӨ Доруобуйаҕа харыстабылын министиэристибэтин ресурсаҕа салаатын дириэктэрэ Альберт Жирков, «КМС-Основа» тэрилтэ генеральнай дириэктэрэ Дмитрий Тужилин, Т.Е.Сосин аатынан Абалаахтааҕы чөлгө түһэрии салаа тэрилтэтин сэбиэдиссэйэ Иннокентий Аринкин, хаһаайыстыбаннай чаас сэбиэдиссэйэ Зинаида Антипина, нэһилиэнньэ социальнай көмүскэллээх буолуутун улуустааҕы кэлим киинин салайааччытын солбуйааччы Мария Федорова бастаан Аллараа Бэстээх бөһүөлэгэр Абалаахтааҕы чөлгө түһэрии, «Сосновка» сонотуоруй турар сирдэрин, дьиэлэрин көрдүлэр.

Оробуочай бөлөҕү улуус баһылыгын тутуу боппуруостарыгар солбуйааччы Василий Филиппов арыаллаан илдьэ сырытта. Салгыы Мөҥүрүөн нэһилиэгэр тутулла турар 51 миэстэлээх аҕам саастаах уонна доруобуйаларынан хааччахтаах дьоҥҥо анаммыт дьиэ уонна баһаарынай чаас тутууларын көрдүлэр. Мөҥүрүөн нэһилиэгин баһылыга Юрий Александров, “Электромонтаж” тэрилтэ дириэктэрин солбуйааччы Василий Пинигин, улуус дьокутааттарын сэбиэтин бэрэссэдээтэлэ Иннокентий Андросов эбийиэктэри көрдөрдүлэр, үлэ хаамыытын билиһиннэрдилэр.

Тутуу матырыйаалынан толору хааччыллан, дьиэлэр ис, тас өттүлэригэр үлэ тэтимнээхтик бара турарын бэлиэтээтилэр.