Дьоруой аата умнуллубат…
![](https://sakha-sire.ru/wp-content/uploads/2024/03/sajt-7-1060x596.jpg)
Кулун тутар 4-5 күннэригэр Алампа аатынан Ытык Күөл орто оскуолатыгар оҕону патриотическай тыыҥҥа иитиигэ туһуламмыт ый чэрчитинэн байыаннай дьайыы кыттыылааҕа, «Эр санааланыы» уордьанынан наҕараадаламмыт Ньургун Николаевич Мочкиҥҥа аналлаах сүгүрүйүү, кэриэстэбил тэрээһиннэр ыытылыннылар.
Ол курдук, бастакы күн Ньургун Мочкин кэриэһигэр төрөппүттэрин көҕүлээһиннэринэн сыал ытыытыгар күрэхтэһии тэрилиннэ. Барыта 6-11 кылаастартан 44 оҕо күөн көрүстэ. Саамай элбэх очкону ылан, муҥутуур кыайыылааҕынан 9-с кылаас үөрэнээччитэ Тарасенко Артур буолла, Мочкиннар дьиэ кэргэн туруорбут анал кубоктарынан уонна сыаналаах бириистэринэн наҕараадаланна. Бары миэстэлэспит оҕолор дипломнары, мэтээллэри, бириистэри тутан үөрүүлэрэ үрдээтэ.
«Биир ньыгыл Арассыыйа” баартыйа олохтообут «Саҥа оскуола” (“Новая школа”) эдэр көлүөнэ ыччаты патриотическай тыыҥҥа иитэр, көҕүлүүр. Дойдубут туһугар бэйэлэрин олохторун кэрэйбэккэ толук ууран, дьоруойдуу быһыыны оҥорбут байыаннай дьайыы кыттыылаахтарыгар, сэрии, тыыл бэтэрээннэригэр анаммыт, 2018 сыллаахха олоххо киирбит Бүтүн Арассыыйатааҕы “Дьоруой паартата” (“Парта Героя”) байыаннай дьайыы хорсун саллаатыгар Ньургун Мочкиҥҥа ананан кулун тутар 5 күнүгэр аһылынна.
Биһиги оскуолабытыгар алын кылаастарга үөрэммит биир дойдулаахпыт Ньургун Николаевич Мочкин дьиҥнээх патриот буолан, байыаннай дьайыыга бастакылар кэккэлэригэр ыҥырыллан барбыта. Донецкай уобаласка 1 гранатометнай взводка ыстаарсай наводчигынан сулууспалаабыта. 2022 сыл ахсынньы 24 күнүгэр үрдүк мырааны (высотаны) ылалларыгар кимэн киириигэ өлөр өлүүттэн чаҕыйбакка, дьоруойдуу быһыыны оҥорон, өстөөх буулдьатыгар табыллан, эдэркээн олоҕун толук уурбута. Кини хорсун быһыытын иһин “Эр санааланыы” уордьанын төрөппүттэригэр туттарбыттара.
«Дьоруой аата умнуллубат» диэн өйдөбүнньүк истиэндэни уонна “Дьоруой паартатын” арыйыы тэрээһинигэр кыттыыны ыллылар: Таатта улууһун баһылыгын социальнай боппуруостарга солбуйааччы Сунхалыров С.В., Таатта нэһилиэгин аҕа баһылыга Павлов Е.И., улуус үөрэҕин тэрилтэтин салайааччыта Дягилев И.И., Ньургун кэнники үлэлээбит Тыараһа орто оскуолатын дириэктэрэ Полускин П.П., кылааһын салайааччыта Алексеева М.В., Ньургун төрөппүттэрэ, кэргэнэ, кыыһа. Төрөппүттэригэр Екатерина Егоровна, Николай Николаевич Мочкиннарга «За верность родительскому долгу» муниципальнай бэлиэ туттарылынна уонна “Таатта нэһилиэгин бочуоттаах олохтооҕо” аат иҥэрилиннэ.
Ньургун Николаевич Мочкин сырдык аатыгар, кини хорсун быһыытыгар анаммыт «Дьоруой паартатыгар» олорор чиэскэ 11 “б” кылаас туйгун үөрэнээччитэ Будикин Антон тигистэ. Кэнчээри ыччаттар ааттарыттан оскуола бэрэсидьиэнэ Дедюкина Сардаана Ньургун Николаевич сырдык аатын үйэлэргэ умнуохпут суоҕа диэн эрэннэрдэ.
Ньургун Николаевич Мочкин кылгас, ол эрэн чаҕылхай олоҕо, кини хорсун быһыыта эдэр көлүөнэ ыччаты патриотическай тыыҥҥа иитиигэ, Ийэ дойдуга бэриниилээх буоларга өрүү холобур буолуоҕа. Дьоруой Ньургун Николаевич Мочкин сырдык аата үйэлэргэ умнуллубат! Саха сирэ, модун Арассыыйа кининэн киэн туттар!
Татьяна НИКИФОРОВА, Маргарита ПАВЛОВА
Сообщить об опечатке
Текст, который будет отправлен нашим редакторам: