Дьоруой аатын иҥэрэргэ илии баттааһын салҕанар

Бойобуой сорудахтары туйгуннук толорбут, эдэр байыастары быыһаары олоҕун толук уурбут гвардия ыстаарсай сержана, разведчик, хорсун хамандыыр Василий Васильевич Даниловка Арассыыйа Дьоруойун үрдүк аатын иҥэрэр туһунан туруорсууга илии баттааһын салҕанар.  Аҕыйах хонук иһигэр 5 тыһыынчаттан тахса илии баттааһына хомулунна.

Бастаан Дьоруой аатын иҥэрэр туһунан Уус Алдан улууһугар бырабыыталыстыба отчуотун кэмигэр тыл этэн, туруорсубуттара. Улуус баһылыга Алексей Федотов нэһилиэнньэ санаатын өйүүрүн биллэрбитэ,  илии баттааһыны хомуйуу саҕаламмыта.

Уус Алдан улууһун Уопсастыбаннай түмсүүлэрин сүрүннүүр сэбиэтин бэрэссэдээтэлэ Лена Павлова тыл этэригэр атын өрөспүүбүлүкэлэр холобурдарын аҕалбыта. Бурятияҕа анал байыаннай дьайыыга хорсуннук сэриилэспит 8 биир дойдулаахтарыгар Арассыыйа Дьоруойун аатын иҥэрбиттэрэ. Ону тэҥэ, Чечня, Тыва, Татарстан, Башкирия, Калмыкия, Чувашия уонна Чукотка хорсун-хоодуот дьоруойдаахтарынан киэн тутталлар. Калмыкияҕа уолларыгар Дьоруой аатын иҥэрээри 5 тыһыынчаттан тахса илии баттааһынын хомуйбуттар.

Бу күннэргэ Василий Данилов туһугар илии баттааһыҥҥа байыаннай дьайыылар бэтэрээннэрэ, идэлээх сойуустар, энэргиэтикэ, суол үлэһиттэрэ, устудьуоннар, урбаанньыттар, учууталлар, спортсменнар, уопсастыбанньыктар кыттыстылар. Анал байыаннай дьайыыларга кытта сылдьар биир дойдулаахтарбыт илии баттыырга бэлэмнэрин туһунан биллэрдилэр. Норуот бэйэтэ баҕаран, анаан көрдөөн кэлэн, баҕатын биллэрэр.

Василий Данилов саҥа сулууспалыы тиийбит биир дойдулаахтарыгар олус кыһамньылаахтык сыһыаннаһарын, мэлдьи сүбэлии-амалыы сылдьарын, уопута суохтары инники кирбиигэ ыыппакка, уустук сорудахтарга бэйэтэ уопуттаах байыастары кытта барарын туһунан кэпсииллэр. Саха уолаттарын көрөн-истэн, араҥаччылаан илдьэ сылдьыбыта, бааһырбыт байыастары уот анныттан эт санныгар көтөҕөн таһааран, өлөр-өлүүттэн элбэхтик быыһаан турар.

Василий ДНӨ Павловка сэлиэнньэтин аннынааҕы бүтэһик кыргыһыытын кэмигэр бөлөх хамандыыра этэ. Бу бөлөххө Саха сирин  уолаттара бааллара. Василий кыргыһыы толоонугар өлөр-өлүү хонуутуттан Мэҥэ Хаҥалас улууһуттан төрүттээх Николай Семеновы таһаарбыта. Быыһаммыт уол кыргыһыы кэнниттэн сибээскэ тахсан, хамандыырдарын үтүөтүнэн тыыннаах хаалбыттарын иһитиннэрбитэ. Хомойуох иһин, хамандыыр бэйэтэ өстөөх буулдьатыгар таптаран, сырдык тыына быстыбыта. Олоҕун толук биэрэн туран, доҕотторун быыһаабыта.

Василий Данилов 1989 сыл олунньу 19 күнүгэр Уус Алдан улууһун Бороҕон сэлиэнньэтигэр төрөөбүтэ. 2013 сыллаахха байыаннай хантараакка илии баттаан, Илиҥҥи байыаннай уокурук Хабаровскайдааҕы 74854 байыаннай чааска сулууспалаабыта. Анал байыаннай дьайыы саҕаламмытыгар, ытык иэһин толорон, Донецкай Норуодунай Өрөспүүбүлүкэтигэр сэриилэһэ барбыта. “Хорсун быһыы иһин” уордьанынан, “За боевые отличия” мэтээлинэн наҕараадаламмыта.
Дьоруой аата ааттаныахтаах, хорсун быһыыта үйэлэргэ умнуллуо суоҕа!

Уопсастыбаннас илии баттыыр пууннара:

1. “Туймаада” ТРК, 1 этээс, «Унция» маҕаһыын.

2. “Айсберг” ТЦ, 2 этээс, “Камелек”, “FORWARD” маҕаһыыннар.

3. “Камелёк” маҕаһыын, Орджоникидзе уул. 56.

4. “Сахапечать” (Бэчээт дьиэтэ), 1 этээс, 125 каб.

5. “Вавилон” ТЦ, 2 этээс, 204 павильон.

   Хаартыска: В.Контоева тиксэриитэ.