Дьоруой Дмитрий Егоров оҕо сылдьан хайдах уол этэй?

Олоҕун толук биэрэн туран Ийэ дойдутун көмүскээбит Арассыыйа Дьоруойа Дмитрий Егоров оҕо сылдьан хайдах уол этэй? Бу туһунан кинини кытта 10 сыл бииргэ үөрэммит, эҥээрдэһэн үөскээбит оҕолоро иһирэхтик ахталлар.

 Марианна Колосова (Алексеева):

— Ыраас халлааҥҥа этиҥ эппитинии, куһаҕан сурах биһиги дууһабытын аймаата. Киһи итэҕэйбэт…
Маҥнайгы кылаастан «эн, мин» дэһэн бииргэ улааппыт, үөрэммит доҕорбут Дмитрий Николаевич Егоров сэрии толоонугар дьоруойдуу оҕутта.
Суруйар, кэпсиир түгэн элбэх буоллаҕа… Биири ахтан аһарыам.
Сайын аайы сынньалаҥ лааҕырдарыгар, үрдүкү кылааска тахсан баран, үлэлиир этибит. Ол курдук, биир сайын Сымалаахха ынах ыырбыт, ньирэй көрөрбүт. Күнүс сөтүөлүүбүт, киэһээ өттүгэр теннис, волейбол оонньуурбут. Дима ыкса доҕорунаан, Сергей Михайловтыын, уол оҕо сиэринэн, тулалыыр сири-дойдуну кэрийэн көрөн, үөрэтэн кэлэллэр этэ. Арай, хас да күн күнүс уолаттар суохтар, кэрийэ бараллар. Үһүс күннэригэр биһигини, кыргыттары, ыҥыран, батыһыннаран, ыт тиҥилэҕинэн хойуутук үүммүт дулҕалаах сиргэ сирдээн аҕаллылар. Лааҕыр оҕолоро тотуохпутугар диэри мип-минньигэс ыт тиҥилэҕин амсайбыт түгэммит мин өйбөр хатанан хаалбыт. Ити курдук, оччоттон бэйэлэрэ эрэ сиэбэккэ, доҕотторун кытта эмиэ үллэстэр санаалаахтар эбит.

Киэҥ нэлэмэн араас алаастар, тыалар, сирдэр… Бу барыта уол оҕо сүрэҕэр Ийэ дойдутугар тапталы саҕар. Ол курдук, биһиги Димабыт дойдутун чиэһин көмүскээн, тэҥэ суох хабыр киирсиигэ утарыла7аачылары кытта кииристэ. Ийэ дойдутун көмүскээн, дьоруойдуу оҕутта! Быдан дьылларга быраһаай, Дима! Эйигинэн киэн туттабыт!
Оҕо саас элэстэнэн, түргэнник да ааспыт эбит… Доҕорбут Дима аҕыйах саҥалаах, үөрэҕи ыарырҕаппат, олус сэмэй оҕо этэ. Этэҥҥэ 11 кылааһы бүтэрэн, бииргэ үөрэммит, улааппыт оҕолор бары студент, үлэһит буолан, олохпут суоллара араҕыстаҕа, дьылҕабыт араастык салалыннаҕа…

Лена Филиппова, Дьокуускай:

— Дима Егоров кылааһынньыгым этэ. Этэ диир ыарахан да тыл… Мин кинилиин  Уһун-Күөл орто оскуолатыгар 10-с уонна 11-с кылааска үөрэммитим. Оччолорго оҕотук көрүҥнээх, элбэх саҥата суох, сэмэй уол этэ. Үөрэҕин улаханнык ыарырҕаппат, ол гынан баран, урут уолаттар тоҕо эрэ олус көнө уонна үөрэх чааһыгар аһары чаҕылхай буола сатаабат муодалаах этилэрэ, ол быһыытынан орто сиэринэн буолара.

Байыаннай дьайыыга барбыт диэни олох да истибэккэ, билбэккэ сылдьыбыт эбиппит. Ол аата улахан аймалҕана суох, мээнэ кими да аймаабакка бардаҕа. Саха уолаттара элбэх саҥата суох буолан баран, тирээн кэллэҕинэ, маннык хорсун, бигэ санаалаах буолаллар эбит.
Кылааһынньыкпыт Дима, быдан дьылларга бырастыы… Биһиги эйигинэн киэн туттабыт, сүгүрүйэбит!

Аанчык Яковлева-Дайаана Сайдам:

— Димкалыын алын кылааска үөрэнэр эрдэхпитинэ, ыаллыы олорбуппут. Ол саҕана сэбиэскэй кэм оҕолоро элбэх буолан, мустан оонньуурбутун сөбүлүүрбүт: лапта, сасыһан, ньиэмэстээх буолан сэриилэһэн, «конница», уо.д.а. Биир ыал оҕолорун курдук этибит, күннээҕи дьиэ үлэтигэр эбээһинэспитин бүтэрэ охсон баран, оонньуугут да диэн сылгылаһар этибит. Кыыс-уол диэн арахсыбат этибит…
Уһун Күөлбүтүн өҥөйөн олорор буоламмыт, далаһабытыгар киирэн күөгүлүүрбүт. Арыт олус үлүһүйэн, түүн 3 чаас буолбутун билбэккэ хааларбыт. Сылайдарбыт, тоҥнорбут да 3 лиитэрэлээх бааҥкаларга мундуларбытын кууспутунан, дуоһуйа астынан тарҕаһарбыт. Чиэрбэлииртэн саҕалаан, хас биирдиибит хаптарара туспа умсулҕан этэ.
Быраатым Андрейкалыын Димка саас аайы наар чалбах дириҥин кээмэйдээн биэрээччилэр, ким саппыкытынан уу баһан ылыар диэри… Арыый улаатан баран, сибиньиэс ууллараллар этэ.
Димка көнө, сэмэй майгылааҕа. Хаһан да кимниин да этиһэрин, өйдөспөт буоларын өйдөөбөппүн. Үрдүкү кылааска кыргыттар дьээбэлээн, үтэн-анньан көрдөхтөрүнэ, килбиктик мичээрдээн кэбиһээччи…
Димка аҕата Николай Алексеевич ол саҕана сэбиэт бэрэссэдээтэлэ, ийэтэ, учууталбыт Евдокия Дмитриевна —  үлэни өрө туппут дьон. Дьиэлэрин таһыгар хортуоппуйу кытта турнепс олордоллор этэ. Биирдэ ону туурарга көмөлөспүппүт, эчи, улаханын, оҕо сототун саҕа буола улаатар дьикти үүнээйини саҥа көрөн, сөхпүттээхпин. Димкалаахтыын нэһиилэ эриэппэлээн туурталаабыппыт, туспа көр-нар буолбута.

Тыа сирин олоҕор, үлэтигэр эриллэн-мускуллан, ыарахантан чаҕыйбат, тулуурдаах, айылҕалыын алтыһан улааппыт уол оҕо, биһиги кылааһынньыкпыт Дима Егоров — Эр Хоһуун хорсун-хоодуот быһыыта үйэлэргэ өйдөбүл, үтүө холобур буолуо.

Хаартыскаҕа: Дмитрий доҕотторугар ыыппыт хаартыскалара туһанылыннылар.