Дьоруой дойдутугар, Баатараҕа тиийэр суолу тутуу үлэтэ саҕаланна

Былырыын Ил Дархан Айсен Николаев сахалартан бастакы Сэбиэскэй Сойуус Дьоруойа буолбут Федор Кузьмич Попов дойдутугар Мэҥэ Хаҥалас улууһун Баатаратыгар Дьоруойдар күннэригэр тиийэ сырыттаҕына, олохтоохтор суол оҥоһуллуутун туруорсубуттара.

Олохтоохтор туруорсуулара болҕомтоҕо ылыллан, бүгүн Ил Дархан сорудаҕынан Дьоруой дойдутугар, Баатараҕа тиийиэхтээх суолу тутуу үлэтэ саҕаланна диэн улуус баһылыга Дмитрий Тихонов иһитиннэрэр.

«3 килэмиэтир 200 миэтэрэ усталаах суолу оҥорууну Мэҥэ Хаҥалас улууһун олохтоох, туруу үлэһит уолаттара Семен, Ян Новгородовтар ылыстылар. Маны тэҥэ быйылгы дьылга Сыымахха диэри гаас утаҕа тардыллыытын бырайыагын үлэтэ оҥоһуллуо. Айсен Сергеевичка дьоммут-сэргэбит этиилэрин ылынан күн бүгүн үлэ саҕаламмытыгар махталбытын биллэрэбит. Бэдэрээтчит тэрилтэбит үлэни болдьоҕор хаачыстыбалаахтык оҥоруо диэн эрэнэбит», — диэн улуус баһылыга санаатын үллэһиннэ.