Дьоруой Ийэлэр ый ахсын 70 тыһ. солк. тахса төлөбүр ылыахтара

«Дьоруой Ийэ» аат 10 уонна онтон элбэх оҕону төрөппүт уонна ииппит дьахталларга иҥэриллэр. Ол курдук, Дьоруой Ийэлэр Арассыыйа Дьоруойдарыгар уонна Үлэ Дьоруойдарыгар көрүллүбүт кээмэйдээх социальнай мэктиэлэри туһанар буолуохтара.

Холобур, кинилэргэ босхо сир учаастага, санаторийга путевка, эминэн-томунан хааччыйыы, босхо стоматология өҥөтө оҥоһуллуоҕа. Итини таһынан чэпчэтиилэр оннугар Дьоруой дьахталлар 70 тыһ. солк. тахса ый аайы төлөнөр төлөбүрү талыахтарын сөп, онуоха сорох чэпчэтиилэрэ хаалларыллыахтара. Ону таһынан, кинилэргэ биэнсийэлэригэр эбии төлөбүр көрүллүөҕэ.

Маннык сокуон барылларын Судаарыстыбаннай Дуума дьокутааттара от ыйын 23 күнүгэр буолбут пленарнай мунньахха бастакы ааҕыыга ылыннылар. Сокуон барыллара Бэрэсидьиэн сорудаҕын толоруу чэрчитинэн оҥоһулуннулар диэн пленарнай мунньахха статс-сэкирэтээр, үлэҕэ уонна социальнай көмүскэлгэ миниистири солбуйааччы Андрей Пудов эттэ.

Бастакы сокуон барыла Дьоруой ийэлэргэ маннык чэпчэтиилэри олохтуур:

• — уочарата суох мэдиссиинискэй көмөнү туһаныы;
• — олорор дьиэ-уот, хомунаалынай өҥөлөр иһин төлөбүрдэриттэн толору босхолонууну;
• — сылга биирдэ санаторнай-курортнай путевканан хааччыйыы;
• — сир учаастактарын бас билиигэ босхо биэрии;
• — тутуу матырыйаалларынан бастакы уочарат хааччыллыы уонна атын чэпчэтиилэринэн туһаныы.

Ити чэпчэтиилэр оннугар дьахталлар 72 403 солкуобайдаах ый аайы төлөнөр төлөбүрү талыахтарын сөп. Онуоха кинилэр чэпчэтиилэр сорохторун ылар бырааптара оннунан хаалар.Төлөбүрү «Госуслуги» портаал нөҥүө оҥотторуохха сөп буолуоҕа. Ону таһынан, ийэлэргэ эбии үлэҕэ киирии уонна босхо идэҕэ үөрэнии кыахтара көрүллүбүт. Дьоруой ийэлэр биэнсийэлэрин кытта тэҥҥэ 36,5 тыһыынча солкуобай кээмэйдээх эбии ый аайы босуобуйаны ылыахтара.

Иккис сокуон барыла эбии төлөбүрдэри киллэрэр уонна 1,5 сааһыгар диэри оҕону көрүү кэмин страховой ыстааска учуоттааһыҥҥа сыһыаннаах хааччахтары суох оҥорор.