Дьоруой Ийэлэргэ ыйдааҕы төлөбүр олохтонуоҕа

РФ Үлэҕэ министиэристибэтэ Дьоруой Ийэлэргэ ый аайы 72,4 тыһыынча солкуобай төлөбүрү олохтуурга этии киллэрбитин туһунан ТАСС иһитиннэрдэ.

«Үлэ Дьоруойдарыгар эмиэ итинник төлөбүрдэр олохтоммуттара», — диэн бэлиэтээтэ биэдэмистибэ салалтата. Төлөбүр 2025 сыл тохсунньу 1 күнүттэн киирэрэ уонна сыллата индексацияланара чопчуланар.

Былырыын ахсынньыга Арассыыйа бэрэсидьиэнэ Владимир Путин “Дьоруой Ийэ” бочуоттаах ааты сүгэр дьахталлар Үлэ Дьоруойдарын курдук социальнай мэктиэлэргэ, төлөбүрдэргэ уонна чэпчэтиилэргэ тиксэллэрин туһунан иһитиннэрбитэ. Судаарыстыба баһылыга Арассыыйа Дьоруой Ийэлэрэ Үлэ Дьоруойдарын курдук үрдүк статустаахтарын, ол эрээри баччааҥҥа диэри үбүнэн-харчынан өйөбүллэрэ олус араастаһарын бэлиэтээбитэ.