Дьоруой кэриэһигэр муус ылыытын күрэһэ буолла

Арассыыйа Дьоруойа Дмитрий Егоров төрөөбүт дойдутугар — Сунтаар улууһун Уһун Күөл бөһүөлэгэр Дьоруой кэриэһигэр анаммыт улуустааҕы «Муус Күүлэй-2023» күрэс буолла. Манна улуустааҕы Аҕалар түмсүүлэрин салайааччы Уларов Борис Михайлович кыттыыны ылла уонна түмсүүгэ саҥа киирэр аҕаларга анал бэлиэни, дастабырыанньаны туттарда. Бу тэрээһиҥҥэ 3 хамаанда күөн көрүстэ.

Түмүккэ 1-кы миэстэни Андреев Г. А., Тихонов И.В., 10-с кылаас үөрэнээччитэ Олимпий Иванов хамаандалара ылан, Дмитрий бииргэ үөрэммит оҕолоро туруорбут «Чемпион» эрбии бирииһи ыллылар.

2-с миэстэ — Ноговицын С.А., Рощин А.Л., 9-с кылаас үөрэнээччитэ Леонид Сидоров хамаандалара.
3 миэстэ — Петров Н.П., Иванов Г.С., 9-с кылаас үөрэнээччитэ Юрлен Никитин хамаандалара ыллылар.
Оҕолорго ойбон алларыытыгар 1-кы миэстэни Иванов Олимпий, 2-с миэстэни Сидоров Леонид, 3-с миэстэни Никитин Юрлен ылан, Аҕалар сүбэлэрэ туруорбут бириистэринэн наҕараадаланнылар.

Бу тэрээһиҥҥэ Дмитрий кылааһынньыктара, улуустааҕы Аҕалар сүбэлэрэ, биирдиилээн дьон уонна тэрилтэлэр бириис туруоран, олохтоох дьаһалта ас-үөл тэрийэн, күрэс олус көхтөөхтүк барда. Уолаттар сибиэһэй салгыҥҥа үлэлээн-хамсаан, дьону кытта алтыһан, саха төрүт дьарыгар кыттыһан, үтүө дьыаланы оҥорортон астынан, элбэххэ үөрэннилэр, эбиннилэр.

Ылыллыбыт муус нэһилиэк аҕам саастаах дьонугар,  байыаннай дьайыы кыттыылаахтарын дьиэ кэргэттэригэр тиэллиэҕэ.