ДПС иниспиэктэригэр быһахтаах киһи түстэ

Саха сиригэр ДПС иниспиэктэрэ быһахтаах түспүт  эр киһини тохтоппут. Бу туһунан ИДьМ пресс-сулууспата иһитиннэрдэ.

Ол курдук, ИДьМ Ленскэй оройуонунааҕы салаатын ДПС иниспиэктэрдэрэ  Ленскэй куорат Орджоникидзе аатынан уулуссаҕа биир хайысхалаах суолга быраабыланы кэһэн утары иһэр массыынаны тохтоторго модьуйбуттар. Онуоха утары иһэр массыына суоппара тохтообокко айанныы турбут. Суол быраабылатын кэһээччи суоппар Мухтуйа түөлбэтигэр биирдэ тохтообут. Онно суоппар арыгы испитэ тута көстүбүт. Кини массыынаттан тахсарын уонна докумуонун көрдөрөрүттэн аккаастаммыт. Суоппар полиция үлэһиттэрин дьайыыларыгар барытыгар утарса олорбут. Федеральнай сокуоҥҥа олоҕуран, иниспиэктэрдэр суоппары массыынаттан таһаарбыттар. Онно биллибитинэн, суоппар 34 cаастаах, олохтоох киһи буолара биллибит. Мэдиссиинэ бигэргэтиитинэн суоппар арыгы испитэ биллибит. Арассыыйа Федерациятын административнай быраабы кэһии  12.8 ыст. 1 ч. киниэхэ административнай боротокуол толоруллубут. Онон массыынатын анал стоянкаҕа илдьэргэ быһаарбыттар.

ДПС иниспиэктэрэ  уруулга олорбут, кини массыынаны ыытан, арыгы испит суоппары илдьэ стоянка сиригэр тиийбиттэр. Ити кэмҥэ арыгы испит суоппар массыына илин сидиэнньэтигэр олорсон испит уонна эмискэ сиэбиттэн быһах хостоон таһаарбыт да, ДПС иниспиэктэрин эчэппит. Төһө да эчэйиилэри ыллар, ДПС иниспиэктэрэ массыынаны тохтотон, киниэхэ саба түспүт киһини быһаҕын быраҕарыгар модьуйбут. Ити кэмҥэ көмөҕө кэлбит бииргэ үлэлиир киһитин кытта саба түһээччини тутан полиция салаатыгар илдьибиттэр. Билиҥҥи туругунан моонньугар, илиитигэр эчэйиилэри ылбыт полиция үлэһитигэр мэдиссиинэ көмөтө оҥоһуллубут. СӨ Силиэстийэлиир Кэмитиэтин Ленскэй оройуонунааҕы  салаата 34 саастаах киһиэхэ Арассыыйа Федерациятын холуобунай кодексатын 317 ыст. «Быраабы араҥаччылыыр уорган үлэһитин олоҕор кутталынан суоһааһын иһин» холуобунай дьыала тэриллибит.