ДПС инспектора суолга хаайтарбыт киһиэхэ көмөлөстө

Дьокуускай куорат олохтооҕо ДПС ОСБ взводун хамандыыра Георгий Зыряновка улахан көмөнү оҥорбутугар махталын тиэрдэр. Инспектор суоппар суолга уустук балаһыанньаҕа түбэспитигэр көмөлөспүт.

СӨ ИДьМ пресс-сулууспата иһитиннэрэринэн, куорат олохтооҕуттан махтал сурук киин куорат Госавтоинспекциятыгар киирбит. Эр киһи кэпсээбитинэн, тохсунньу 15 күнүгэр кини дьиэ кэргэнин кытта Дзержинскэй уулуссатынан айаннаан истэхтэринэ, тымныыны тулуйбакка икки кэлиҥҥи көлүөһэтэ тэстибит. Ол күн куоракка -40 кыраадыс этэ.

Салгыы сатаан айаннаабат буолан, суол кытыытыгар массыынатын тохтоппут. Ол кэмҥэ кинилэр аттыларыгар ДПС массыыната кэлэн тохтообутугар, эр киһи көмө көрдөспүт.

Полиция хапытаана Георгий Зырянов көлүөһэлэр тэстибиттэрин көрөн, патруллуур массыынаттан компрессор таһааран, көлүөһэлэри оҥорорго көмөлөспүт. «Үлэһит киһи быһыытынан эрэ буолбакка, үтүө киһи быһыытынан бэлиэтиибин», — диэн махталлаах суоппар суруйбут.