Хаартыска: СИА.
Муус устар 3-5 күннэригэр Дьокуускайга XXIV Өрөспүүбүлүкэтээҕи эдэр суруйааччылар сүбэ-мунньахтара ыытыллар. Сүбэ-мунньах үлэтэ өйүүҥҥүттэн аныгы драматургияҕа уонна киинэ сценарийын суруйууга маастар-кылаастартан саҕаланыаҕа. Бу маастар-кылаастар тэрээһин партнердара — Саха тыйаатырын кытта бииргэ үлэлэһии чэрчитинэн, ыытыллыахтара.
— Муус устар 3 күнүгэр күнүс 2 чаастан режиссер Любовь Борисова киинэ сценарийын суруйууга маастар-кылааһы ыытыаҕа. Кини киинэ сценариһын уонна режиссер быһыытынан Саха сирин ааттаппыт, киэҥник биллибит киһи, саха киинэтин инники күөнүгэр сылдьар биир улахан маастар буоллаҕа.
Икки сыллааҕыта, 23-с сүбэ-мунньахха драма сиэксийэтигэр бастыҥ аатын ылбыт, Амма улууһун Мээндиги нэһилиэгин баһылыга Илья Семенов суруйбут «Кыһыл байыас» пьесатын ааҕыы буолуоҕа. Ону сэргэ аныгы драматургия тула киэҥ кэпсэтии тэриллиэҕэ. Бу маастар-кылааһы Саха тыйаатырын сүрүн режиссера Руслан Тараховскай, литературнай чаас сэбиэдиссэйэ Надежда Ильина иилиэхтэрэ-саҕалыахтара.
Эдэр суруйааччылар сүбэ-мунньахтарын чэрчитинэн буолар маастар-кылаастарга ким баҕалаах бары, литератураны, драманы, киинэ сценарийын суруйууну кэрэхсиир улахан дьон, оҕо, ыччат, идэтийбит суруйааччылар сылдьан истиэхтэрин, элбэххэ үөрэниэхтэрин сөп, — диэн Саха сирин Суруйааччыларын сойууһун бырабылыанньатын бэрэссэдээтэлэ Гаврил Андросов иһитиннэрдэ.
Сүбэ-мунньах эдэр ааптардарга айымньыларын биллэр суруйааччыларга аахтаран, ырыттаран, инникитин айар үлэлэригэр сүбэ-ама ылалларыгар, киэҥ эйгэҕэ биллэллэригэр көмөлөөх.
Сүбэ-мунньахха 18-40 саастаах эдэр ааптардар айымньыларын ыытан, сүүмэрдээһини ааһан, кытталлар. Кэтэхтэн түһүмэххэ айымньыларын ыытан, суруйааччылларга аахтарбыттара. Үлэлэри сиэксийэлэринэн ырыталлар: саха поэзията; саха прозата; нуучча литературата; аҕыйах ахсааннаах хотугу норуоттар литературалара; драма (сааһынан хааччахтааһын суох); оҕо литературата; кириитикэ (сааһынан хааччахтааһын суох).
Ыспыраапка: Эдэр суруйааччылар сүбэ-мунньахтарын Саха сирин Суруйааччыларын сойууһа тэрийэн ыытар. Аан бастаан сэбиэскэй кэмҥэ ыытыллар этилэр, ол эрээри, дойдуга уларыйыы-тэлэрийии буолан, 1987 сылтан ыытыллыбакка турбута. Наталья Харлампьева бэрэссэдээтэллээх сойуус 2004 сыллаахха Эдэр суруйааччылар сүбэ-мунньахтарын сөргүтэн, икки сыл буола-буола ыытан кэллэ. Бу кэм устата сүүһүнэн ыччат дьон кытыннылар, сүүрбэччэ киһи Саха сирин Суруйааччыларын сойууһун чилиэнэ буолла, кинигэлэрэ бэчээттэннэ.
Уус Алдан улууһун Бээди оскуолатын 2-с кылааһын үөрэнээччитэ Эрхан Захаров улахан киһилии хорсун быһыыны оҥорбут,…
Дойду бэрэсидьиэнэ Владимир Путин көҕүлээһининэн Саха сиригэр култуура сайдар. “Добро.рф ассоциацияҕа” киирэр “Култуура волонтердара” Бүтүн…
Уус Алдан улууһун Бороҕоннооҕу оҕо ускуустубатын оскуолатын материальнай-тиэхиньиичэскэй баазата биллэрдик хаҥаабыт. Дойду бэрэсидьиэнэ Владимир Путин…
Быйыл Арктика улуустарыгар Арктикатааҕы атыы-логистика хампаанньата олохтоох хаһаайыстыбалар үүннэрбит хаппыысталарын, сүбүөкүлэлэрин, моркуоптарын уонна хортуоппуйун киллэрэн…
ИДьМ Дьокуускайдааҕы 4-с нүөмэрдээх полиция салаатын дьуһуурунай чааһыгар, мэдиссиинэ тэрилтэтиттэн, куорат биир кыбартыыратыгар эр киһи…
Киһи кулгааҕа тыаһы, дорҕоону икки кулгааҕынан истэргэ аналлаах. Өскөтүн биир эрэ кулгаахха наушнигы кэтэн иһиттэххэ…