«Дроннар мастарыскыайдара» аахсыйаҕа кытыннылар

Саха сиригэр олорор таджиктар сойуустара «Дроннар мастарыскыайдара» аахсыйаҕа кытынна.

Аахсыйа Дьокуускайга А.Е.Кулаковскай аатынан норуоттар доҕордоһууларын дьиэтигэр ыытыллар. Манна Саха сиригэр таджиктар общиналарыттан бэрэстэбиитэллэр Давлатшо Нуров уонна Парвиз Исмоилов аахсыйаҕа кыттаннар принтердары, монитордары, тэлэбиисэрдэри уо.д.а. наада буолар тэриллэри аҕалан биэрдилэр.

Пилота суох көтөр аппарааттары бэлэмнииргэ туттуллубат буолбут тиэхиньикэни А.Е.Кулаковскай аатынан норуоттар доҕордоһууларын дьиэтигэр аҕалан туттарыахха сөп. Аахсыйаҕа бу иннинэ СӨ тас сибээскэ уонна норуоттар дьыалаларыгар министиэристибэтэ, СӨ ыччаттарын ассамблеята кыттыбыта.