Дроннары куоталаһыннарыыга бастакы миэстэни Саха сирин хамаандата ылла

От ыйын 24-27 күннэригэр Дьокуускайга “Дохсун” успуорт комплексыгар 75 мм, 200 мм уонна 330 мм кылаастарга Уһук Илиҥҥи федеральнай уокурукка бастыыр иһин күрэхтэһии уонна чөмпүйэнээт буолла.

Күрэхтэхһиигэ Амур, Сахалин уобаластарыттан, Бурятияттан уонна Саха сириттэн 30 спортсмен кытынна диэн Ил Дархан, бырабыыталыстыба пресс-сулууспата иһитиннэрэр.

Уопсай зачекка 7 кыһыл көмүс, 8 үрүҥ көмүс уонна 10 боруонса, барыта 25 мэтээли ылан, бастакы миэстэни Саха сирин хамаандата ылла. Иккис миэстэҕэ Амурскай уобалас таҕыста – 11 мэтээллээх (7 кыһыл көмүс, 4 үрүҥ көмүс), үһүскэ Сахалин – 3 мэтээллээх (2 үрүҥ көмүс, 1 боруонса), төрдүскэ Бурятия Өрөспүүбүлүкэтэ – 3 мэтээллээх (1 үрүҥ көмүс, 2 боруонса).

«Дойду бэрэсидьиэнэ Владимир Путин сорудаҕынан олоххо киирбит «Пилота суох авиация систиэмэлэрэ» национальнай бырайыак чэрчитинэн биһиги оскуолабыт маннык бырайыагы олоххо киллэрэр былаһаакка буолбутуттан олус үөрэбин. Бу биһиги үөрэнээччилэрбитигэр саҥа суоллары арыйар уонна аныгы технология эйгэтигэр умсугуйалларыгар кыах биэрэр. Биһиги оскуолабыт манна кыттан авиация уонна робототиэхиньикэ эйгэтигэр эрчилиннилэр. Хас биирдии оҕо бэйэтин кыаҕын арыйарын  туһугар бары кыһамньыбытын уурабыт.

Онтон бу сырыыга биһиги оҕолорбут Уһук Илиҥҥи федеральнай уокурукка бастыыр иһин күрэхтэһиигэ уонна чөмпүйэнээккэ күрэхтэстилэр, бэртээхэй түмүктэри көрдөрдүлэр. Бу тэрээһин учууталлар уонна оскуола сыралаах үлэлэрэ, тулуурдара уонна өйөбүллэрэ үтүө түмүктэри биэрэрин өссө төгүл бигэргэттэ», — диэн Арктическай оскуола учуутала, СӨ сүүмэрдэммит хамаандатын чилиэнэ Алексей Бехтюев санаатын үллэһиннэ.