Хаартыска: Андрей Сорокин, ЯСИА
Саха сиригэр пилота суох тиһиктэр күүскэ сайдаллар. Өрөспүүбүлүкэ элбэх логистическай уустуктарын быһаарарга, ону тэҥэ эрэгийиэҥҥэ саҥа технологиялары киллэриигэ бастыҥнар кэккэлэригэр таһаарарга биир хардыынан буолуохтарын сөп. Бу туһунан Ил Дархан Айсен Николаев пилота суох авиационнай тиһиктэргэ «Полярнай» научнай-оҥорон таһаарар киини арыйыы кэмигэр эттэ.
Киини арыйыы «Сыыппара алмааһа» пуорум чэрчитинэн ыытылынна. «Пилота суох көтөр аппарааттар биһиги олохпут суолталаах чааһынан буоллулар – дойду оборуонатын күүһүн өттүнэн да, экэниэмикэҕэ саҥа технологиялар сайдыыларын өттүнэн да. Мин санаабар, пилота суох тиһиктэри сайыннарыы сайдыыга өссө биир улахан хардыыны оҥорор кыахтаах: биһиги киэҥ нэлэмэн сирбит-уоппут уонна онтон сибээстээх уустуктар, киһи уонна экэниэмикэ ороскуоттара, ону тэҥэ килиимэт усулуобуйалара. Кинилэри бастыҥ технологиялар көмөлөрүнэн, ол иһигэр көтөр аппарааттарынан, кыайыахха-хотуохха сөп», — диэтэ кини.
Ил Дархан бэлиэтээбитинэн, научнай-оҥорон таһаарар кииҥҥэ пилота суох тиһиктэри кытта сибээстээх бары хайысхалар – үөрэтииттэн саҕалаан оҥорон таһаарааччыларга уонна оҥорон таһаарыыга тиийэ түмүллүөхтэрэ.
«Элбэх уустуктар, араас бюрократическай процедуралар уонна биһиги мэйиибитигэр олохсуйан хаалбыт эргэ өйдөбүллэр бааллар, ол эрээри биһиги манна оҥорон таһаарарбыт өрөспүүбүлүкэ хас биирдии олохтооҕун олоҕор төһө кыалларынан түргэнник киирэрин курдук, барытын түргэнник оҥоруохтаахпыт. Маннык холобурдар номнуо бааллар», — диэтэ Айсен Николаев.
Ил Дархан дрон көмөтүнэн кыра габариттаах таһаҕаһы тиэрдиигэ «Салгын туорааһына» диэн сервис холобурун аҕалла. Бырайыак өрөспүүбүлүкэ киин куоратын уонна Өлүөнэ өрүс утарыта кытылыгар турар Аллараа Бэстээх бөһүөлэгин ситимнээбитэ.
«Миигин ордук үөрдэринэн, сервис судаарыстыба наадатыгар анаан ханнык эрэ бородууксуйаны таспат. Сервис аһы-үөлү, араас утахтары таһыыга уонна көннөрү дьон наадыйыытынан туһаныллар буолан эрэр. Олох хаачыстыбатын тупсарыыга бэрэсидьиэн, дойду бырабыыталыстыбата уонна биһиги оҥоһууларбыт барыта ити туһугар ананар», — диэн эрэгийиэн баһылыга бэлиэтээтэ. РФ Сыыппара сайдыытын, сибээс уонна маассабай коммуникация миниистирин солбуйааччыта Андрей Заренин эппитинэн, научнай-оҥорон таһаарар киин аһыллыыта пилота суох тиһиктэр сайдыыларыгар дьиҥнээх түһүмэҕи биэриэҕэ.
«Мин Саха сиригэр иккистээн кэллим уонна сирин-уотун да, килиимэтин да сыаналаан үлүннүм, онон «Полярнай» НОТК аһыллыыта олус суолталаах диэхпин баҕарабын. Билиҥҥи кэмҥэ оҥорон таһаарыыттан олоххо киллэриигэ түргэнник көһөр олус наадалаах. Бу киин аһыллыыта итини оҥорорго кыах биэриэҕэ», — диэтэ кини. Бырамыысыланнаска уонна эргиэҥҥэ министиэристибэтин пилота суох тиһиктэр уонна робототехника управлениетын начаалынньыгын солбуйааччыта Никита Тканко иһитиннэрбитинэн, Саха сирэ макрорегиоҥҥа дрон сайдыытыгар лидер буоларыгар барыта баар.
Айсен Николаев Сбербааҥҥа туһалаах уонна түмүктээх үлэтин иһин махтанна. Кини холбоһуктаах былааннар кэмиттэн кэмигэр олоххо…
2026 сылга судаарыстыбаннай бүддьүөттэн санитарнай авиацияны уонна эминэн хааччыйыыны үбүлээһин улаатыаҕа, диэн Үп миниистирин эбээһинэһин…
Сэтинньи 29-30 күннэригэр «Дохсун» успуорт уораҕайыгар ыытыллар «Дыгын оонньууларын» бастакы сүүмэрдиир күрэҕэр успуорт көрүҥнэригэр чаҕылхай…
Сэтинньи 29 күнүгэр Санкт-Петербург куоракка «Профессионаллар» диэн профессиональнай маастарыстыба Бүтүн Арассыыйатааҕы чөмпүйэнээтин финала саҕаланар. Кыттааччылар…
Түөкүннэр биэнсийэҕэ мунньуллубут үбү-харчыны эбэтэр аҕам саастаахтар тус мунньуммут харчыларын «уһун болдьохххо мунньунан уурунуу бырагырааматыгар»…
Таатта улууһун Н.Е.Мординов-Амма Аччыгыйа аатынан үөрэхтээһин холбоһугун ювелирдары бэлэмниир бөлөҕүн үөрэнээччилэрэ Дьокуускайдааҕы бырамыысыланнай тиэхиньикум ювелирнай…