Дронунан таһаҕас тиэрдэр маршрут ахсаана кэлэр сылга элбиэҕэ

Саха сиригэр «Воздушная переправа» пилота суох таһаҕаһы тиэрдии бырайыагын маршруттарын ахсаана кэлэр сылга 20-ҕэ тиийиэҕэ. Бу туһунан «Пилота суох тиһиктэр: кэлэр кэм технологиялара» пуорумҥа Саха сирин бырабыыталыстыбатын бэрэссэдээтэлин солбуйааччыта Анатолий Семенов иһитиннэрдэ диэн ТАСС суруйар.

«Баһыылканы ыытар сыаната 200 солкуобай. Дьиҥинэн, бу өссө ночоотун саппат, ол эрээри биһиги күһүҥҥэ диэри өссө алта маннык рейси үлэлэтиэхтээхпит. Кэлэр сылга сүүрбэччэ маннык рейс баар буолуоҕа», — диэн кини эттэ.

Анатолий Семенов бэлиэтээбитинэн, билигин маршруттары сөбүлэһии уонна наадалаах сиргэ баар инфраструктураны – уоҥҥа уон миэтэрэ иэннээх кыра «дронопорттары» тутууга сыһыаннаах боппуруостар быһаарылла тураллар. От ыйыгар Саха сиригэр бастакы пилота суох тиэрдии үлэлээн саҕалаабыта.

СӨ Ил Дархана Айсен Николаев иһитиннэрбитинэн, Дьокуускай уонна Аллараа Бэстээх икки ардыларыгар дронанар кыра кээмэйдээх таһаҕаһы тиэрдэр саҥа сервис үлэлээн саҕалаабыта. Сакаастары олохтооҕу маркетплейс нөҥүө оҥоруохха сөп. Дроннар 10 киилэҕэ диэри ыйааһыннаах баһыылкалары тиэйэллэр, оттон көтөр кэмнэрэ 15 мүнүүтэҕэ диэри.

Атырдьах ыйын 1 күнүнээҕи туругунан, 192-тэ көтүү оҥоһуллубут, салгыҥҥa көппүт уопсай кэмэ – 2 384 мүнүүтэ (39,7 чаас). Уопсайа 143,5 киилэ таһаҕас тиэрдиллибит. Бырайыак «Якутия» технопарк уонна эрэгийиэннээҕи инновацияны сайыннарар пуонда өйөбүллэринэн Саха сирин инновационнай хампаанньаларын көмөтүнэн олоххо киирдэ.