ДСК – cайдыы саҥа кэрдииһигэр. Дьокуускайга дьиэни тутар сыах үлэтин саҕалаата

Олунньу 28 күнүгэр, бээтинсэҕэ, Ил Дархан Айсен Николаев дьиэни тутууга саҥардыллыбыт сыах үлэтин саҕалыырыгар сырытта.

Хаһан эрэ өрөспүүбүлүкэҕэ тутуу салаатын баһылаан турбут ДСК собуота  өрөспүүбүлүкэ бас билиитигэр бэриллиэҕиттэн, үлэтин хаттаан саҕалаата.

Саҥардыы бастакы түһүмэҕин чэрчитинэн, ДСК собуотугар тутуу блоктарын оҥорор бастакы линия үлэҕэ киирдэ.

“Бүгүн биһиги ДСК-бытыгар саҥа олоҕу биэрдибит. Бэйэтин кэмигэр хайдах үлэлээбитин бары өйдүүбүт – саамай таһаарыылаахтык үлэлиир кэмигэр кэмбинээт өрөспүүбүлүкэҕэ анаан 100 тыһыынча квадратнай миэтэрэҕэ тиийэ олорор дьиэни оҥорон таһаарара, элбэх эбийиэктэр тутуллубуттара. Онтон уустук, ыарахан кэмнэр кэлбиттэрэ. 2023 сыллаахха мин кэмбинээти өрөспүүбүлүкэ бас билиитигэр биэрэр туһунан быһаарыыны ылыммытым. Бу үлэҕэ кыттыыны ылбыт дьоҥҥо барҕа махталбын тиэрдэбин. Бастатан туран, тэрилтэни судаарыстыбаннай бас билиигэ төнүннэрбит эрэ буолбакка, ДСК-ны уларытан оҥоруу уонна саҥардыы бастакы түһүмэҕин түмүктээбит Өрөспүүбүлүкэтээҕи ипотечнай ааҕыныстыбаҕа. ДСК үлэтин саҥа түһүмэҕэ бэлэм бородууксуйаны оҥорууга эрэ буолбакка, тутуу салаатыгар каадырдары бэлэмнээһиҥҥэ эмиэ күүс-көмө буолуоҕар эрэнэбин. ДСК уруккуттан итинэн уратылаах, бу үтүө үгэс салҕанан барыа диэн бигэ эрэллээхпин. Бүгүн ДСК судаарыстыбаннай хампаанньа быһыытынан саҥардыллыбыт үлэтин салгыаҕа уонна сайдыы саҥа таһымыгар тахсыаҕа”, — диэтэ Ил Дархан Айсен Николаев.

Саҥалыы уларытан оҥоруу кэнниттэн тэрилтэ сыл ахсын 35 тыһыынча кв. м тиийэ дьиэни таһаарар, 170 киһини үлэнэн хааччыйар кыахтаныаҕа. Саҥардыы иккис түһүмэҕэ 2026 сылга былааннанар, ол собуот оҥорон таһаарыытын икки төгүл улаатыннарыаҕа.

Собуоту саҥардыы сүрүн сыалынан өрөспүүбүлүкэҕэ олорор дьиэ кв.м. сыанатын 15% диэри аччатыы буолар.

Собуоту саҥардыыга ылыллыбыт аныгы оборудование барыта Санкт-Петербург, Казань уонна Новосибирскай тэрилтэлэригэр оҥоһуллубуттар.

Саҥа оборудованиены табыгастаахтык аттарыы түмүгэр, бырайыагы оҥорооччулар хас да былаһаакканы босхолуур кыахтаммыттара, онно кэлин түннүк уонна аан көҥдөйдөрүн, бетон таастары уонна дьоҕус архитектурнай формалары оҥоруохтара.

Саҥа оборудование кыаҕа ханнык баҕарар оҥоһук характеристикатын түргэнник уларытар кыаҕы биэрэр. Урут саҥа оҥоһукка оборудованиены бэлэмнээһин 2 нэдиэлэни ылар эбит буоллаҕына, билигин аҕыйах чаас барар.

Бастатан туран, собуот бородууксуйата өрөспүүбүлүкэ саамай бөдөҥ тутуулара бара турар сирдэригэр – Сулустаах уонна Спортивнай микро-түөлбэлэр дьиэлэрин тутууга барыаҕа. Бу туһунан Ил Дархан, бырабыыталыстыба пресс-сулууспата иһитиннэрэр.