ДСК түөлбэтигэр 900 миэстэлээх оскуола үлэҕэ киириэҕэ

“Үөрэхтээһин” национальнай бырайыак чэрчитинэн Дьокуускай куорат ДСК микрооройуонугар өрөспүүбүлүкэҕэ саамай улахан, 990 миэстэлээх оскуола тутулла турар.

Үс мэдиэмэннээх таас дьиэ быйылгы сыл бүтүүтүгэр үлэҕэ киирэрэ былааннанар.

Бэҕэһээ. от ыйын 18 күнүгэр, киин куорат баһылыгын социальнай боппуруостарга солбуйааччы Владимир Аржаков үөрэх кыһаларын тутууларын уонна өрөмүөннэрин хаамыытын бэрэбиэркэлээтэ.

— Ил Дархан Айсен Николаев үөрэх эбийиэктэрин тутуутугар ураты болҕомтону уурар. Төрөппүттэргэ кырачааннара үөрэх кыһаларыгар маҥнайгы кылааска киириилэрэ уустуктары үөрэтэ сылдьыбыт буоллаҕына, кэлиҥҥи сылларга киэҥ-куоҥ, сырдык, аныгы  ирдэбилгэ эппиэттиир оскуолалар үлэҕэ киирэн, кыһалҕа биллэ аччаата. Куорат уокуругун дьаһалтата  өрөспүүбүлүкэ бырабыыталыстыбатын уонна судаарыстыбаннай-чааһынай бииргэ үлэлээһин механизмын кытта бииргэ үлэлэһэн, национальнай бырайыактары олоххо киллэриигэ үлэ хаамыыта тэтимнээх. Генеральнай былаан чэрчитинэн киин куоракка 12 уопсай үөрэхтээһин эбийиэктэрэ уонна 18 оскуола иннинээҕи үөрэхтээһин эбийиэктэрэ тутуллуохтара, — диэн бэлиэтээтэ Владимир Аржаков.