Бу күннэргэ Өймөкөөн улууһун бочуоттаах гражданина, сылгыһыт Дугуйдан Винокуров Магадааҥҥа аһаҕас халлаан анныгар хоно сылдьар ыраах айаҥҥа турунуоҕа.
Бу туһунан кини “Сахамедиа” холдинг пресс-киинигэр буолбут суруналыыстары кытта буолбут пресс-кэмпириэнсийэҕэ иһитиннэрдэ.
Биллэн турар, суруналыыстар бастакынан Дугуйдан ханнык аттары илдьэрин туһунан ыйыттылар. Аатырбыт айанньыт икки атынан айанныыр буолбут. Онтон биирэ – биһиги билэр Хонорбут. Иккиһэ — эмиэ ыраах айаҥҥа сылдьа үөрэхтээх ат эбит.
“Туох таҥаһы кэтэн бараҕын?” диэн ыйытыыга Нуучча географическай уопсастыбатын Саха сиринээҕи салаатын чилиэнэ, Дугуйдан ыраах айаннарын иилээн-саҕалаан илдьэ сылдьар сүбэһитэ Егор Борисов хоруйдаата:
— Дугуйданы Өймөкөөнтөн кини таҥаһын ыраах айаҥҥа барарыгар тикпит Изабелла Элякова бэйэтэ тэрийэн атаарыаҕа. Уолбут Сейимчээҥҥэ диэри айаныгар таба, саһыл, куобах тириилэринэн тигиллибит өбүгэ былыргы таҥастарын кэтэн барыаҕа. Маны таһынан, аатырбыт «BASK» фирма аныгы таҥаһа тымныыны хайдах туруулаһарын бэрэбиэркэлиэҕэ. Онон 800 км айанныыр эдэр киһи саха былыргы уонна ыччат аныгы таҥастарын кэтэн айанныаҕа.
Дугуйдан Винокуров тоҕо Магадааҥҥа диэри турунна? Быйыл Өймөкөөҥҥө ыытыллар Олоҥхо ыһыаҕын 7 тосхолуттан биирдэстэрэ – саха норуотун духуобунаһын түсчүттэрэ, Өймөкөөнү дорҕоону ааттаппыт саха 1-кы гильдиялаах меценат-атыыһыта, Өймөкөөн улууһун Тарын нэһилиэгиттэн төрүттээх Н.О. Кривошапкин уонна Өймөкөөнү иккис дойду оҥостубут А.Е. Кулаковскай-Өксөкүлээх Өлөксөй Сейимчээҥҥэ айаннаабыт суолларынан кинилэр ааттарын үйэтитии. Биллэн турар, былыргы үйэҕэ ааттарын киэн тутта ааттыыр дьоммут аһаҕас халлааҥҥа хоно сылдьан айаннаабыттара чахчы. Онон Дьөһөгөй сылыгар ыытыллар Олоҥхо ыһыаҕар Дугуйдан бу айана – төрөөбүт улууһугар үйэлээх бэлэҕинэн буолара саарбахтаммат.
Пресс-кэмпириэнсийэ кэмигэр Дугуйдан Винокуров Москваҕа туруммут экстремальнай айаныгар анаммыт хаартыскалаах почта кэмбиэрэ, 3D маарка-виньетка, анал штемпель биһирэмэ буолла.
Бу маны ааптар, чинчийээччи-айанньыт, почта историга, филатуризм норуоттар икки ардыларынааҕы түмсүүлэрин салайааччыта Валерий Сушков билиһиннэрдэ. Дизайнер – Наталья Плигина. “Бу Дугуйдан Винокуров илии баттааһыннаах почтовай аккырыыкка РФ Бэрэсидьиэнэ Владимир Путиҥҥа, Ил Дархан Айсен Николаевка тиэрдиллиэҕэ. Дугуйдан айанын аатырбыт айанньыт Федор Конюхов анаан кэтээн көрөр. Кини Өймөкөөн сылгыһытыгар истиҥ эҕэрдэтин ыытта. Онон, биир дойдулаахтара, Саха сирин Федор Конюховынан — Дугуйданынан киэн туттуҥ! ”, — диэн бэлиэтээн эттэ уонна суруналыыстарга тарҕатта.
Үөрүүлээх быһыыга-майгыга пресс-кэмпириэнсийэ кыттыылаахтара почтовай маарканы сүрэхтээтилэр.
Дугуйдан Винокуров бэйэтин кытта «Улуу дьоммут аартыктарынан» айаныгар почта бу кэмпилиэгин илдьэн Магадаан уобалаһын 13 нэһилиэнньэлээх пуунунан ааһан, төрүт олохтоохторго бэлэхтээн ааһыаҕа. Дугуйдан Винокуров мөссүөннээх аккырыыкка кэлин олус сыаналаах бэлэххэ кубулуйуоҕа. «Улуу дьоммут аартыктарынан» айан филателистическай оҥоһугун e-mail: info@postventure.ru эбэтэр +7-950-805-22- 11/ WhatsApp нүөмэригэр суруйан билсиҥ.
Бу 2025 сылга Кыыллаах орто оскуолатын кыраайы уонна устуоруйаны үөрэтэр түмэлэ тэриллибитэ 55 сыла. Садот…
Дьокуускайга өрөспүүбүлүкэ муниципальнай тэриллиилэрин бэрэстэбиитэллээх уорганнарын дьокутааттарын III сийиэһэ буола турар. Ил Түмэн спикерэ Алексей…
«Кыайыыга бииргэ!» өрөспүүбүлүкэтээҕи хамыыһыйа суһал ыстаабыгар анал байыаннай дьайыы кыттыылаахтарыгар Саҥа дьыллааҕы бэлэхтэри түҥэтии саҕаланна.…
Ахсынньы аам-даам тымныытын билиммэккэ, эмиэ айаҥҥа туруннубут. Бу сырыыга массыынабыт багажнигар көннөрү бакыаттар буолбакка, кимнээх…
Саха сиригэр "Уоту сэрэт – АДПИ туруор!" диэн дьиэҕэ буруо таҕыстаҕына сэрэтэр сигнализацияны туруоруу хампаанньата…
Ахсынньы 18 күнүттэн Дьокуускай куорат «Лена», «Синема», «Центральнай» уонна өрөспүүбүлүкэ үрдүнэн тарҕанан олорор «Сахафильм», «Экстра…