Духуу туһуттан икки сылга диэри көҥүлэ быһыллыан сөп

Киин куоракка маҕаһыыннартан, араас тэриллэртэн уоруу тахса турар. Бу күннэргэ маҕаһыынтан парфюмернай  бородууксуйаны уорбут дьахтар тутулунна.

Полиция 3-с нүөмэрдээх отделыгар 10 тыһ. солк. суумалаах табаары уоруу туһунан сайабылыанньа киирбитин туһунан ИДьМ иһитиннэрдэ.

Суһал-ирдиир үлэ кэмигэр холуобунай ирдэбил үлэһиттэрэ табаары уорбут 27 саастаах урут сууттана сылдьыбыт Алдан улууһуттан төрүттээх дьахтары туттулар.

Дьахтар  духуу атыылаһар былааннаах эбит, ол гынан баран харчы төлүүр санаата суоҕун эппит. Инньэ  гынан биир маҕаһыыҥҥа атыылаһааччы буолан кубулунан киирбит, стеллажтары кэрийэн көрбүт уонна сөбүлүү көрбүт табаарын уоран ылан кууркатын  хармааныгар уктубут. Ол кэннэ маҕаһыынтан тахсан барбыт.

Билигин дьахтарга РФ Холуобунай кодексын 158 ыст. 1 чааһынан холуобунай дьыла көбүтүллүбүт. Инньэ гынан уоруйах 2 сылга диэри көҥүлэ быһыллыан сөп.