Дьуһуурунай борокуруор: Алдаҥҥа дьиэ кырыыһатыттан сууллубут эр киһи тыына быстыбыт

Ааспыт сууккаҕа Саха сиригэр 6 буруйу оҥоруу бэлиэтэннэ. Бу туһунан СӨ Борокуратуурата иһитиннэрэр.

Дьокуускай, Нерюнгри куораттарга уонна Жатай бөһүөлэгэр икки бэлисипиэти, питбайгы, электросамокаты, диискэлээх эрбиини уорбуттар.

Өрөспүүбүлүкэ киин куоратын олохтооҕуттан «домофон күлүүһүн уларытабыт» диэн ньыманан албыннаан 950 000 солкуобайы уорбуттар.

Дьокуускай куорат Н. Чусовской аатынан уулуссаҕа баар чааһынай дьиэ бастакы этээһиттэн сууллубут 2022 с.т. кыыс оҕону доруобуйа харыстабылын тэрилтэтигэр киллэрдилэр.

Дьокуускай куорат Хабаров уулусса дьиэтин 4-с этээһин түннүгүттэн сууллубут 1988 с.т. эр киһи балыыһаҕа киирдэ.

Алдан улууһугар кырыыһаны туруора сылдьан тутулла турар эбийиэктэн охтубут 1984 с.т. эр киһи ылбыт эчэйиититтэн миэстэтигэр тыына быстыбыт.

Ленскэй улууһугар траншеяттан турбаны көтүрэ сылдьан буор сууллан түһэн, 1987 с.т. эр киһи миэстэтигэр тыына быстыбыт.

Сунтаар улууһун Кириэстээх сэлиэнньэтигэр Бүлүү өрүскэ 2012 с.т. оҕо ууга түспүт, өлүгэ көстүбүт. Бу чахчыларынан быһылаан төрүөттэрин быһаарыы борокуратуура хонтуруолугар сылдьар.

Киһи өлүүлээх суол быһылаана тахсыбата. Ленскэй улууһугар биир киһи эмсэҕэлээбит суол быһылаана тахсыбытын туһунан иһитиннэрдилэр.

Суукка устата итирик туруктаах  8 суоппар тутулунна.