Дьуһуурунай борокуруор: буруйу оҥоруу 7 түбэлтэтэ таҕыста

Ааспыт сууккаҕа өрөспүүбүлүкэҕэ буруйу оҥоруу туһунан 7 иһитиннэрии киирбит. Бу туһунан СӨ Борокуратуурата иһитиннэрдэ. 

Ол иһигэр Дьокуускай куоракка уоруу —  2, түөкүннээһин  — 4,   «Регул Мото» скутеры күрэтии,  наркотигынан эргинии биирдии  түгэннэрэ бэлиэтэммит.   Нерюнгрига 1975 сыллаах төрүөх киһиттэн албыннаан, түөкүннээн туран,   500 тыһ. солк. уорбуттар.

Мииринэй Арыылааҕар  «Лифан Солано» массыына суоппара  2017 сыллаах төрүөх кыра кыыһы түҥнэри көппүт.  Кыысчаан   суолу көҥүллэммэт сиринэн туораан испит.

Нерюнгрига  «Тойота Аурис»  уонна  «Хонда Аккорд» массыыналар харсыһаннар, икки суоппар араас эчэйиини ыланнар балыыһаҕа киирбиттэр.

Алдан оройуонугар Аллараа Кураанахтан 10 км сиргэ   «Хонда Фит» суоппара уруулун сатаан туппакка, түҥнэстибит. Инньэ гынан суол быһылааныгар  массыынаҕа олорсон испит  2018 сыллаах төрүөх оҕо эчэйиини ылан балыыһаҕа киирбит.