Дьуһуурунай борокуруор: быһаҕынан анньыллыы, саанан ытыллыы

Ааспыт сууккаҕа өрөспүүбүлүкэҕэ 8 буруйу оҥоруу бэлиэтэннэ.

Олорго процессуальнай бэрэбиэркэни ыытыы уонна өрөспүүбүлүкэ борокуратууратын хонтуруолунан холуобунай дьыалалары силиэстийэлээһин бара турар.

Бүлүү улууһун Кыһыл Сыыр бөһүөлэгэр эр киһини өлөрбүттэр. Ленскэй куоракка 1992 с.т. эр киһи быһаҕынан анньыллан балыыһаҕа киирбит, уорбаланааччы булуллубут. Өлүөхүмэ улууһун Кээччитигэр 2002 сыллаах төрүөх эр киһи саанан ытыллан балыыһаҕа киирбит, уорбаланааччы булуллубут. Уус Алдан улууһугар Кылаайы сэл. 40 км. ыраах сиргэ 1983 сыллаах төрүөх эр киһи өлүгэ көһүннэ, кини бултуу сылдьан алҕаска саанан ытыы түмүгэр өлбүт.

Дьокуускай куоракка уоруу тахсыбыт, сокуону кэһэн туран наркотигынан эргиниигэ буруйу оҥоруу тохтотуллубут. Алдан оройуонугар сымыйа докумуону туттубуттара тутулунна.

Горнай улууһугар сылгыны иитэр баазаҕа баар балаҕан умайбыт, онно 1982 уонна 1980 с.т. икки киһи өлүгэ көһүннэ, балаһыанньа чуолкайдана сылдьар.

Уус Алдан улууһун Бороҕон сэл. 1958 с.т. суоппар “Тойота Ипсум” массыынаны ыытан иһэн, 1982 с.т. сатыы киһини охсубута, ылбыт эчэйиилэриттэн өлбүт. Амма улууһугар суол саахала тахсыбыт, ол түмүгэр сатыы баран испит дьахтар балыыһаҕа киирбитэ.

Суукка иһигэр итирик туруктаах айаннаан испит түөрт суоппар тутулунна.