Дьуһуурунай борокуруор: Далырга эдэр киһи өлүгүн буллулар

Саха сиригэр ааспыт сууккаҕа 5 буруйу оҥоруу түбэлтэтэ регистрацияланна.

СӨ Борокуратуурата иһитиннэрэринэн, Дьокуускай куоракка суотабай төлөпүөнтэн харчы уорбут икки уорбаланааччыны туттулар. Нерюнгри улууһугар уопсайа 680 тыһ. солк. тахса суумалаах түөкүннээһин икки  түбэлтэтэ регистрацияланна. Мииринэйгэ суоппар тырааныспарга итирик туруктаах сылдьан хаттаан уруулга олорбут чахчыта бэлиэтэннэ.

Үөһээ Бүлүү улууһугар Далыр нэһилиэгиттэн 20 км ыраах Кырыкат күөл аттыгар балыктыы сылдьан ууга тимирэн өлбүт 1989 с.т. эдэр киһи өлүгүн буллулар.

Мэҥэ Хаҥалас улууһугар 2020 с.т оҕо итии ууга буһан балыыһаҕа киирдэ. Киһи өлүүлээх суол быһылаана регистрацияламмата.  Сууккаҕа барыта 9 суоппар итирик туруктаах сылдьан тутулунна.