Дьуһуурунай борокуруор: Дьокуускайга гарааска икки оҕо гаастан сүһүрбүт

Өрөспүүбүлүкэҕэ суукка иһигэр 7 буруйу оҥоруу тахсыбыта бэлиэтэннэ. Бу туһунан СӨ Борокуратуурата иһитиннэрэр.

Өлүөхүмэ улууһун Бастакы Нөөрүктээйи сэлиэнньэтигэр 1982 с.т. эр киһи доруобуйатыгар ыар эчэйиини оҥорбуттар, кини быһаҕынан анньыллан балыыһаҕа киллэриллибит. Уорбаланааччы быһаарыллыбыт.

Өрөспүүбүлүкэ киин куоратыгар уоруу тахсыбыт, ону таһынан «ВАЗ-2104» уонна «Тойота Пробокс» мааркалаах икки массыынаны күрэтии туһунан иһитиннэриилэр киирбиттэр.

Ленскэй уонна Мэҥэ Хаҥалас улуустарыгар итирик туруктаах сылдьан тырааныспары иккиһин ыытыы чахчылара быһаарылыннылар.

Мииринэй улууһугар 1984 с.т.  эр киһи үлэлии сылдьан буурдуур тиэхиньикэттэн  сууллан түһэн, төбөтүн эчэтэн балыыһаҕа киллэриллибит.

Дьокуускайга Марха түөлбэ Мастаах уулуссатыгар баар чааһынай дьиэттэн, собуоттанан турар массыыналаах гарааска оонньуу сылдьан гаастан сүһүрбүт 2016 уонна 2018 сыллаах төрүөх икки оҕо балыыһаҕа киллэрилиннэ.

Сунтаар сэлиэнньэтигэр тахсыбыт баһаарга дьон өлбүтүнэн баһаар төрүөтүн быһаарыы борокуратуура хонтуруолугар турар.

Киһи өлүүлээх суол быһылаана бэлиэтэммэтэ.

Суукка иһигэр итирик туруктаах уруулга олорбут 8 суоппар тутулунна.