Дьуһуурунай борокуруор: киһини төбөҕө охсон эчэтии, ууга түспүт киһини көрдөөһүн…

Ааспыт сууккаҕа Саха сиригэр 5 буруйу оҥоруу тахсыбыт. Манан процессуальнай бэрэбиэркэни ыытыыны уонна холуобунай дьыалалары чинчийиини СӨ Борокуратууратын уорганнара хонтуруолга туталлар. 

Дьокуускайга 1970 с.т. эр киһи доруобуйатын улаханнык эмсэҕэлэттилэр. Төбөҕө охсон эчэтэннэр, балыыһаҕа киирдэ.

Дьокуускайга уонна Майа сэлиэнньэтигэр олорор биэнсийэлээҕи уонна устудьуону албыннаан, уопсайа 2,5 мөлүйүөн солкуобайы уорбуттар. Түөкүттэр аҕам саастаах киһиэхэ «Росфинмониторинг» үлэһитэ эрийэбин» диэн албыннаан, куттаан, 2,2 мөлүйүөн солкуобайы сойбоппуттар.

Киин куоракка арыгы иһэн баран, массыынаны хаттаан ыытыы түгэннэрэ бэлиэтэннилэр.

Булуҥ улууһугар Өлөөн өрүскэ Нагым диэн сиргэ  1979 с.т. уонна 1981 с.т. эр дьон оҥочонон баран иһэн, ууга түспүттэр. Биир киһитин санитарнай рейсинэн аҕалан, балыыһаҕа киллэрбиттэр. Иккис киһи көстө илик. Борокуратуура бу дьыаланы хонтуруолга тутар.

Бу ааспыт сууккаҕа киһи өлүүлээх суол быһылаана тахсыбата. 25 киһи арыгы иһэн баран, массыынаны ыыта сылдьан, тутулуннулар. Бу туһунан СӨ Борокуратууратын телеграм-ханаала иһитиннэрэр.