Дьуһуурунай борокуруор: Суол саахалыгар пассажир, аҕам саастаах эр киһи эчэйбиттэр

Ааспыт суукка устата Саха сиригэр буруйу оҥоруу туһунан икки иһитиннэрии киирбит.  Бу туһунан СӨ Борокуратууратын пресс-сулууспата иһитиннэрэр.

Дьокуускай куоракка табах уонна арыгы бородууксуйатын сокуону кэһэн атыылааһын чахчыта быһаарылынна, оттон Ленскэй улууһугар — сааны-саадаҕы сокуона суох харайыы.

Киһи өлүүлээх суол быһылаана бэлиэтэммэтэ.

Дьокуускайга Чернышевскай уонна Дежнев уулуссаларын быһа охсуһуутугар, «ТЛК 200» массыына суоппара светофор кыһыл уотугар айаннаан иһэн, «Тойота Виш» массыынаны кытта харсыспыт. Салгыы «Тойота Краун» массыынаҕа уонна 1949 с.т. суолу туораан испит эр киһини түҥнэри көппүт. Суол быһылаанын түмүгэр «Тойота Краун» пассажира уонна аҕам саастаах эр киһи киһи элбэх эчэйиини ылан, балыыһаҕа киирбиттэр.

Суукка устата итирик туруктаах уруулга олорбут 5 суоппар тутулунна.