Дьуһуурунай борокуруор: Тааттаҕа биир саастаах оҕо бассейҥҥа тимирэн өлбүт

Саха сиригэр ааспыт сууккаҕа 6 буруйу оҥоруу тахсыбыта бэлиэтэннэ. Бу туһунан СӨ Борокуратууратын пресс-сулууспата суруйар.

Ньурбаҕа «Түкээн» сириттэн  быһаҕынан анньыллыбыт эр киһи балыыһаҕа киирдэ, 1989 с. т. уорбаланааччы тутулунна.

Дьокуускай куоракка уоруу тахсыбытын уонна түөкүннээһин туһунан сайабылыанньалар киирдилэр. Ленскэй оройуонугар эмиэ албыннаан үбү-харчыны уоруу тахсыбытын туһунан тыллаатылар.

Таатта улууһугар Ытык Күөлгэ дьиэтин аттыгар 2023 с.т. оҕо бассейҥҥа түһэн тыына быстыбыт.

Сууккаҕа 9 баһаар тахсыбыт, өлбүт уонна эмсэҕэлээбит дьон суох. Жатай бөһүөлэккэ 1987 с.т. суоппар  «Тойота Раум» мааркалаах масыынанан суолга утары балаһаҕа тахсан, «КАВЗ 4270-82» оптуобуһу кытта харсыста. Саахал түмүгэр омук массыынатын суоппара миэстэтигэр өлбүт, оттон оптуобус кондуктора балыыһаҕа киллэриллибит.

Суукка устата 15 суоппар итирик туруктаах сылдьан тутулунна.