Дьуһуурунай борокуруор: түөкүттэртэн сэрэниҥ!

Ааспыт суукка устата Саха сиригэр буруйу оҥоруу туһунан аҕыс иһитиннэрии киирбит.  Бу туһунан СӨ Борокуратууратын пресс-сулууспата иһитиннэрэр.

Дьокуускайга реанимацияҕа түөһүгэр хайа анньыллан улахан эчэйиини ылан киирбит 1979 с.т. киһи тыына быстыбыт.

1981 с.т. дьахтартан баанын счетуттан билбэт киһитэ 170 тыһ.солк. харчытын уорбут.

Устудьуон кыыһы Росфинмониторинг сымыйа үлэһитэ «ZOOM» сыһыарыынан угаайыга киллэрэн, 402 тыһ.солк. суйдаабыт.

Маны сэргэ, өрөспүүбүлүкэ киин куоратын үс олохтооҕун түөкүттэр чэпчэки сыаналаах дьиэнэн албыннааннар, 2 мөл.солк. суйдаан ылбыттар.

Дьокуускайга, Бүлүүгэ арыгы испит дьон хаттаан массыына ыыппыттара биллибит.

Киһи өлүүлээх суол-тырааныспар быһылаана бэлиэтэммэтэх.

Кэнники хонукка 9 киһи арыгы иһэн баран массыына ыытан тутуллубут.

https://t.me/tprocsakha