Дьукаахтар элбээри гыммыттар…

Бээ, мин куорат оҕонньоро аатыран баччааҥҥа диэри олордоҕум дии. Биэтэс Билээхэп да буоламмын, Дьокуускай куоракка тахсар үтүө уларыйыылары сэргэ сиэргэ баппат быһыылары, араас дьулаан устуоруйалары барытын билэ-истэ олоробун.

Бэҕэһээ биир сонунтан соһуйдум, тиэрэ эрэ кэлэн түспэтим. Куораппыт саамай мааны оройуонугар – 203 түөлбэҕэ баар улахан дьиэ бастакы этээһигэр туора дьон кыстаабыт курдук кэпсэтэллэр. Хата, дьонуҥ онно унитаас туруоран дьэндэппиттэр. Унитаас таһыгар остуол турар, сымнаҕас дьыбаан баар. Онон, кырдьык, кыстаабыт да буолуохтарын сөп. Ону салайар хампаанньа тойоно  сантиэхиньиктэр уонна муоста сууйааччылар сынньанар хосторо  диэн куотуммут этэ. Чэ, баҕар, буоллун, хара үлэнэн дьарыктанар дьон сынньанар хостоох буолаллара туох куһаҕаннаах буолуой? Ол эрээри элбэх кыбартыыралаах дьиэ олохтоохторугар баһаарынай өттүнэн сэрэхтээх буолууһу. Арай туран, бу дьонуҥ үлэ чааһа бүттэ даҕаны дьиэлэригэр ыстанаары, уокка холбообут билииккэлэрин дуу, чаанньыктарын дуу арааралларын умнан кэбистиннэр. Сантиэхиньик Сааса убуорсуса Мааса араарыа диэн баран баран хааллын? Куттанан саныахпын да баҕарбаппын. Иэдээн буолар эбээт. Оннооҕор сэрэх киһи сороҕор мин умнабын ээ.

Ол эрээри кырдьаҕас бөрө испэр атыны толкуйдуубун. Арааһа, дьиэтэ-уота суох сылдьар, баҕар, быстах үлэҕэ кэлбит дьону уоран кыстаттылар дуу, хайдах дуу. Дьэ, дьон олорор дьиэтин хоһун оннук да гыммыт буоллахтарына көҥүлэ.

Тоҕо инньэ дии саныырым эмиэ оруннаах. Куораппытыгар соҕуруулары үтүктэн кэнсийиэрискэлэри үлэлэтэр муода киирбитэ ыраатта. Ол наймыламмыт үлэһиттэр олороллоругар анаан саҥа дьиэлэр аайы туспа хостору оҥорор буолбуттар. Онно сороҕор атын дойдулартан кэлбит үлэһиттэр кыһыннары-сайыннары олороллор үһү. Эмээхсиним билсэр дьахтара чэйдии кэлэ сылдьан кэпсээбитэ.

Биирдэ кэбиниэккэ бииргэ олорор киһитэ: “Дуунньа, сүрдээх асчыккын быһыылаах”, – диэн соһуппут. Асчыта суох барахсан Дуунньа астыырын сөбүлээбэтин туһунан эппитигэр: “Киирэн кэллэххинэ, минньигэс баҕайы алаадьы сыта кэлэр ээ”, – диэбит. Дьэ, ол кэнниттэн бабат-татат диэн кэтээн көрбүтэ, бастакы этээскэ кэнсийиэрискэ дьахтардара күн аайы баахыла  бөҕөнү астаан, оронун үрдүгэр өрөһөлүүр эбит.  Уонна илдьэн уулуссаҕа атыылыы турар буолар үһү. “Оо, төһөлөөх уоту сиэбитэ буолуой?” – диэн абаран өйбөр суоттуу олорбутум.