Дьулустаан Борисов Горнайга саҥа хочуолунайдар үлэлэрин кытта билистэ

Өрөспүүбүлүкэ бэрэссэдээтэлин бастакы солбуйааччы Дьулустаан Борисов Горнай улууһугар оробуочай сырыытын кэмигэр Аһыма сэлиэнньэтин 120 миэстэлээх оскуолатын сылааһынан хааччыйар хочуоллаах саҥа блок-модулу көрдө.

«Бу тэрили туруоруу – сэлиэнньэни сылааһынан хааччыйыы систиэмэтин модернизациялааһын бырайыагын боруобалыыр түһүмэҕэ”, — диэтэ Дьулустаан Борисов.

Айылҕа гааһынан үлэлиир модульнай хочуолунай тымныы килиимэт усулуобуйатыгар туһанарга аналлаах.

“Боруобалыыр бырайыак сүрүн соруга – туһанарга судургу уонна  экэниэмикэ өттүнэн барыстаах хочуолунайдары туһаныыны олоххо киллэрии. Социальнай эбийиэктэри аныгы хочуолунайдарга көһөрүү кыра инвестицияҕа муҥутуур туһаны ыларга көмөлөһүөҕэ”, — диэн Саха сирин бастакы вице-премьерэ бэлиэтээн эттэ.

Исписэлиистэр сыаналыылларынан, Аһыма оскуолатын сылааһынан хааччыйарга  өрөспүүбүлүкэ бүддьүөтүн ороскуота боруобалыыр бырайыак кэнниттэн 85% диэри намтыаҕа.

СӨ Ил Дарханын уонна бырабыыталыстыбатын пресс-сулууспата